जनकपुरको जनकनन्दिनीमा पनि फूड बैंक सँचालन, सहयोगको अपिल

न्यूज ब्यूरो, जनकपुरधाम । निरन्तर लकडाउनका कारण काम नपाएर दुई छाक टार्न नसकेको निमुखाहरुको लागि धनुषाको जनकन्दिनी गाउँपालिकाभित्र पनि फूड बैंक सँचालन गरिएको छ ।

आईतबार जनकनन्दिनी गाउँपालिका वडा नं. ४ खजुरी स्थित सँचालन गरिएको फुड बैँकबाट सो स्थानका गरिब, निमुखाहरुलाई राहत वितरण गरिएको छ । उनीहरुलाई चामल, दाल, तेल, नुन, तरकारी लगायतका समाग्रीहरु वितरण गरिएको छ ।

हुनेले दिएर जानु, नहुनेले लिएर जानु नारा सहित ज्याला मजदुरी गरी कमाएर खानेहरु अहिले लकडाउनले गर्दा कठिनाईमा रहेको बेला फूड बैँक सँचालन गरी सहायता गरिरहेको छ । टिमका युवा ईन्द्रजीत गोईत सहित धनुषा युवा युनिटिको सँयुक्त पलहमा फूड बैँक सँचालन गरिएको हो ।

सो क्रममा मध्यमवर्गीय परिवारले सो फूड बैँकमा अन्नदान गरी सहयोग गर्न अपिल समेत गरेको छ । गरिब निमुखाको लागि दुई छाक टार्न सम्पन्न परिवारले विपन्नहरुको लागि अन्न दान गर्न र सहयोग गर्न आग्रह गरिएको हो ।

टिमले धनुषाको जुनसुकै ठाउँमा निमुखा, भोका भए आफूहरुलाई खवर गरेपछि जुनसुकै ठाउँमा पुग्ने बताएका छन् ।