सार्वजनिक पोखरी हत्याउने प्रयास, विवादित बनाएर वडाध्यक्ष मोटाउँदै

न्यूज ब्यूरो, सिरहा । पहिला पहिला बढी जथा भएका धनमनी व्यक्तिहरु स्वइच्छाले जग्गा, पोखरी अथवा समुदायले लाभ लिनसक्ने सम्पत्ति सरकारको नाममा गरिदिने चलन थियो ।

गाउँघरमा त्यसबेला यस्ता यस्ता पनि मनकारीहरु हुन्थे, जसले सारा सम्पत्ति नै समाजको लागि सरकारलाई सुम्पिदिन्थे । सन्तान नभएका तर, जथा बढी भएका अधिकांश व्यक्तिहरुले सरकारकै नाममा सबै सम्पत्ति गरिदिने गर्थे । केहिले भने केहि सम्पत्ति सरकारलाई र केहि सम्पत्ति आफन्तलाई दिइहाल्थे । त्यत्ति मात्र नभई केहि धनी व्यक्तिहरुले त सन्तान भएपनि आफूसँग भएका सम्पत्तिमध्ये केहि सम्पत्ति दान गरिदिन्थे ।

तर, अहिलेको सताब्दीमा भने लोभीपन हावी हुँदै गएको छ । त्यसताका उनीहरुले समाजका लागि सरकारलाई दान गरिदिएका सम्पत्ति अहिले उनीहरुका आफन्तबाट हत्याउने प्रयास भइरहेको पाइन्छ ।
कल्याणपुर नगरपालिका–९ डुमरीका सुबाई यादव (माइजन) आफ्नो सम्पत्ति मध्येका एक बिघा ११ कठ्ठा ५ धुर क्षेत्रफलको डुमरीको पोखरी र पोखरीको डिल सरकारको नाममा दान गरे । उनको सन्तान थिएन । समाजले लाभ लिन सकोस् भन्ने उद्देश्यले गत २०४५ सालतिर बाँकी सम्पत्ति आफ्ना भाइहरुलाई दिई पोखरी र डिल उनी श्री ५ को नाममा मिनहा गरिदिए ।

तर, सरकारको नाममा आइसकेपछि सार्वजनिक सम्पत्ति भइसकेको त्यो पोखरी र पोखरीको डिल अहिले उनका आफन्तद्वारा हत्याउने प्रयास भएको छ । उनका भाइका छोराहरु चन्दर यादव, सौखिया यादव, घुर्ना यादव, भुट्कुन यादव लगायतबाट त्यो सार्वजनिक सम्पत्ति हत्याउने प्रयास भएको हो ।

सुबाईका भतिजोहरुले पोखरी र पोखरीको डिल आफ्नो दाबी गर्दै फिर्ताको लागि अदालतमा मुद्दा दायर गरेका छन् । सरकारको नाममा गरिदिएपछि तत्कालिन डुमरी गाबिसले सालाना डेढ लाख रुपैयाँ जतिमा ठेक्का लगाउँदै आएको उक्त पोखरी अहिले विवादित बनेको छ ।

उनीहरुको मुद्दापछि गत वर्ष जिल्ला अदालत सिरहाले ठेक्का नलगाउनु र नलिनु भनेर निषेधाज्ञा जारी गर्यो । पोखरीमाथि मुद्दा परेपछि ठेक्का लाग्न नसक्दा अहिले सुबाईका आफन्तहरुले उक्त पोखरी आफ्नो तरिकाले प्रयोग र आम्दानी गरिरहेका छन् ।

सरकारको नाममा स्वइच्छाले दान गरिएको उक्त पोखरी र डिल यहाँका जनप्रतिनिधिकै मिलेमतोमा हत्याउने प्रयास भएको स्थानीय बताउँछन् । कल्याणपुर–९ का वडाध्यक्ष सूर्यनाथ यादवले नै उक्साएर उनका आफन्तलाई आफ्नो दाबी गर्दै फिर्ताको लागि मुद्दा मामिलामा जान लगाएको स्थानीयको भनाइ छ ।

पोखरीलाई विवादित बनाएपछि निजी जस्तो प्रयोग गर्न पाउने मनसायले वडाध्यक्ष यादव बाहिरबाट गौण बसेको र भित्रबाट मुद्दा गर्न उक्साएर मिलेमतोमा अहिले पोखरीबाट लाभ लिइरहेको स्थानीय पल्टु ठाकुरले बताए । ‘सुबाई बाबाले उतिबेला समाजका लागि सोंचेर सरकारको नाममा गरिदिनु भयो, उहिले पोखरीलाई विवादित बनाएर उहाँका आफन्तहरु निजी जस्तो बनाएका छन्,’ उनले भने, ‘यसमा वडाध्यक्षको ठूलो हात छ ।’

वडाध्यक्ष यादवलाई विवाद टुंगो लगाउन पहल गर्न पटकपटक आग्रह गर्दा पनि मौन बसेको उनले बताए । सरकारको नाममा भइसकेको सम्पत्ति सरकारकै हुनुपर्ने र यस विषयमाथि सम्बन्धित निकायले चाँसो लिई विवाद चाँडै टुंग्याउनुपर्ने स्थानीयहरुको माग छ ।