जनकपुरमा 'दाहा' को विषयलाई लिएर दुईतर्फा झडप, दर्जनौ घाईते !

न्यूज ब्यूरो, जनकपुरधाम । जनकपुरमा आज दिउँसो झडप हुँदा दर्जन बढी जना घाईते भएका छन् ।

जनकपुरधाम उपमहानगरपालिका वडा नं. २० देवपुरा रुपैठामा आज (शनिबार) दाहाको विषयलाई लिएर दुई पक्षबीच भडप हुँदा दर्जनौ व्यक्ति घाईते भएका हुन् ।

स्थानीय एक युवकले ‘दाहा’को फोटो सामाजिक संजालमा शेयर गरेको विषयमा विवाद चर्किदा झडप भएको जिल्ला प्रहरी कार्यालय धनुषाले जनाएको छ । मुस्लिम धर्मावलम्बीहरुको पर्व मोहरमको उपलक्ष्यमा निर्माण गरिने दाहाको फोटो विषयमा विवाद भएको प्रहरीले जनाएको छ ।

समाजिक सँजाल फेसबुकमा दाहाको फोटोमा अपशब्द प्रयोग गरी सेयर गरिएको भन्ने विषयमा विवाद उग्र भएपछि झडप भएको प्रहरीले जनाएको छ । विवादभएपछि दुई तर्फबाट ढुँगामुढा भएपछि स्थिति तनावग्रस्त बनेको थियो ।

जिल्ला प्रहरी कार्यालय धनुषाका प्रहरी नायब उपरीक्षक मकेन्द्र मिश्रले स्थिति नियन्त्रणमा लिन प्रहरीले ७ राउण्ड अश्रु ग्यांस प्रहार गरेका छन् । अहिले अबस्था सामान्य ‌रहेको र विवाद मिलाउन दुबै पक्षबीच छलफल भइरहेको उनले जानकारी दिए ।

उनका अनुसार एक व्यक्तिले मोहरम पर्व मनाउन मुस्लिम समुदायले बनाएको ‘दाहा’को तस्विर सामाजिक संजालमा अपशब्द प्रयोग गरी शेयर गरेकाले विवाद हुंदै आएको थियो । आज विवाद चर्किदा झडप भएको छ ।

अहिले घटनास्थलमा मोटो संख्यामा नेपाल प्रहरी र सशस्त्र प्रहरी परिचालन गरिएको छ ।