सिरहाको कमल दहमा महिलाको लास

न्यूज ब्यूरो, सिरहा । सिरहाको कमलादह पोखरीमा डुबेको र मृत अवस्थामा एक महिलाको शव (लास) फेला परेको छ ।

मिर्चैया नगरपालिका–९ स्थित कमलदहमा अन्दाजी २४÷२५ वर्षीया महिलाको शव भेटिएको हो । मृतकको पहिचान भने हुन सकेको छैन ।

बिहीवार (आज) अपरान्ह करिब ५ बजेतिर पानीमा तैरिरहेको देखेपछि स्थानीयहरुले शव निकालेको प्रहरीले जनाएको छ । “डुबेर बेहोस जस्तो देखिएपछि हामीले उद्धार गर्न खोज्यौं” स्थानीयको भनाइलाई उदृत गर्दै प्रहरीले भन्यो, “तर बाहिर ल्याएर हेर्दा मृत्यु भइसकेको थियो ।”

जितिया पर्वमा पोखरीमा अबेर नुहाउन गएको र डुबेको हुनसक्ने घटनास्थलका स्थानीयको भनाइ छ । शव पोष्टमार्टमको लागि लहान पठाउने तयारी भइरहेको छ ।

घटना सम्बन्धमा थप अनुसन्धान भइरहेको इलाका प्रहरी कार्यालय मिर्चैयाका प्रहरी नायव उपरीक्षक (डिएसपी) सन्तुप्रसाद जैसवारले बताए ।