तेस्रो मधेश आन्दोलन : निकु, सँजय र दिलिपको बलिदानीको ५ वर्ष

न्यूज ब्यूरो, जनकपुरधाम । तेस्रो मधेस आन्दोलनको क्रममा जनकपुरधाममा आजैका दिन जनकपुरधाममा तीन जनाले सहादत दिएको आज ५ वर्ष पुरा भएको छ ।

वि.सं. २०७२ साल भदौ २५ गतेका दिन तेस्रो मधेस आन्दोलनको क्रममा जनकपुरधाम उपहानगरपालिका वडा नं. १ मिल्स एरियाबाट दिलीप यादव, निकु यादव र सँजय चौधरीलाई शसस्त्र प्रहरीले टाउकोमै गोली हानी हत्या गरेको थियो ।

स्थानीय प्रशासनले लगाएको कर्फयू आदेशलाई पनि अवज्ञा गर्दै “चलु जनकपुर भरु जनकपुर” कार्यक्रमको दौरान आजैका दिन गाउँ गाउँबाट आएका मासले सुरक्षा घेरा तोडेपछि वितण्डा मच्चाइएको थियो ।

आन्दोलन र प्रदर्शनको क्रममा धनुषा जमुनियाका १३ वर्षिय निकु यादव, सिनुरजोडाका १७ वर्षिय दिलीप यादव र महेन्द्रनगरका सदभावना पार्टीका जिल्ला सदस्य २८ वर्षिय सँजय चौधरीलाई प्रहरीले नियन्त्रणमा लिएर टाउकोमा गोली हानेका थिए ।

तत्कालिन सँयुक्त लोकतान्त्रिक मधेसी मोर्चाले आव्हान गरेको “चलु जनकपुर भरु जनकपुर” कार्यक्रममा सहभागी हुन जनकपुर आईपुगेका तीनै जनाले मधेस आन्दोलनको नाममा ज्यानको आहुति दिएका थिए ।

त्यसबेला, संघीय सरकारका वर्तमान स्वास्थ्यमन्त्री एवम् संघीय समाजवादी फोरमका अध्यक्ष उपेन्द्र यादव, सहित वर्तमान राजपा एवम् तत्कालिन तमलोपाका अध्यक्ष महन्थ ठाकुर , सद्भावनाका राजेन्द्र महतोको गठबन्धनको रुपमा रहेको सँयुक्त लोकतान्त्रिक मधेसी मोर्चाले आन्दोलनको घोषणा गरेको थियो ।

झण्डै ६ महिना चलेको मधेस आन्दोलनको क्रममा कैयौँले छोरा र भाई गुमाए भने कैयौँ मधेसी महिलाले सिन्दूर निभाएइन । त्यस बेला मोर्चाका नेता समेत रहेका राजेन्द्र महतोले मधेस आन्दोलनको क्रममा बलिदानी दिनेलाई ५० लाख रुपैैयाँ टाउकोको मूल्य तोकेका थिए ।

उनीहरु मधेस आन्दोलनमा नेताहरुकै उक्साहटमा ज्यानको आहुति दिएपनि नेताहरुले सत्तालिप्त भएर उनीहरुको परिवारलाई बर्षमा २ पटक पनि हेर्न गएको छैन । उनीहरुको विच्चली भएको छ ।

आन्दोलनको सेन्टिमेन्टमा उपेन्द्र यादव संघीय सरकारको स्वास्थ्य मन्त्री समेत बने भने अहिले प्रदेश २ मा समाजवादी पार्टी र तत्कालिन राजपाको सरकार छ । कैयौँ अगुवाहरु प्रदेश सरकारका मन्त्री भएका छन् भने कैयौँले प्रदेश सरकारकै जागिरमा लागेका छन् ।

केही शहिद परिवारलाई प्रदेश सरकारले जागिर दिएपनि बाँकीका शहिद परिवारको हालात भने त्यस्तै देखिएको छ । मधेशी शहिदको सेन्टिमेन्ट लिएर जितेका समाजवादी पार्टी जहिले पनि मधेशी शहिद र आन्दोलनको चिठ्ठा देखाएर आम जनताको भोट लिँदै आएको छ ।

तर, यसपाली भने तराई मधेशमा समाजवादी पार्टीको पक्कड कमजोर हुँदै गएको छ । विभिन्न समयमा जनतासँग गरेको वाचालाई पुरा नगरी जातीवाद, नातावाद, कृपावादमा लागेर आम नागरिकको मनोभावनालाई नबुझेको भन्दै तराई मधेशमै उपेन्द्र यादव नेतृत्वको पार्टी कमजोर हुँदै गएको छ ।