क्यान्सर पीडितलाई आर्थिक सहयोग, सहयोगको अपील

न्यूज ब्यूरो, सिरहा । क्यान्सर रोगबाट पीडित मिर्चैया नगरपालिका–१० का एक व्यक्तिलाई आर्थिक सहयोग गरिएको छ ।

मिर्चैया–१० पिपरा निवासी ३८ वर्षीय शिवनन्दन कापरलाई मिर्चैयाको शान्ति युवा क्लवले आर्थिक सहयोग गरेको हो । शिवनन्दन विगत २ महिनादेखि ब्लड क्यान्सरबाट पीडित छन् ।

आर्थिक समस्याका कारण उनी उपचार गराउन सकिरहेका छैनन् । भरतपुर क्यान्सर अस्पतालमा उनी झण्डै एक महिना उपचार गराए । उपचारमा हालसम्म करिब ५ लाख जति खर्च भइसकेको छ ।

चिकित्सकले थप ८ लाख जति खर्च हुने बताएपछि रुपैयाँ नहुँदा उनी घर फर्केर आएका छन् । उपचारमा सहयोग होस् भनेर सकेको आर्थिक सहयोग गरेको क्लबका अध्यक्ष रामनारायण साहले बताए ।

‘हामी अझ सहयोग गर्छौं,’ उनले भने, ‘तर हामीले गरेर मात्रै पुग्दैन, उहाँको जीवन रक्षाको लागि मनकारी मनसँग आग्रह गर्छु ।’ उपचारको लागि मोटो रकमको आवश्यकता रहेकाले सबैले मानवता देखाउनुपर्ने क्लबका सदस्य ललित कुमार साहले बताए ।

पीडित कापरले आफ्नो जीवन रक्षाको लागि सहयोग गरिदिन आग्रह पनि गरेका छन् । उनको ५ जना बालबच्चा छन् ।