५० वटा भेन्टिलेटर खरिद गर्दै मधेश सरकार

न्यूज ब्युरो, जनकपुरधाम । प्रदेश २ का सरकारले प्रदेशको विभिन्न अस्पतालको लागि ५० वटा भेण्टिलेटर खरिद गर्ने भएको छ ।

प्रदेश सङ्कट व्यवस्थापन केन्द्र (पिसिएमसी) को बैठकले विभिन्न जिल्लाहरूमा कोरोनाका कारण ज्यान गुमाउनेहरुको सँख्या बढन थालेपछि भेन्टिलेटर खरिद गर्ने निर्णय गरेको हो ।

केही दिनदेखि कडा लक्षणसहितको बिरामीहरू फेला पर्न थालेको र कतिपय गम्भीर प्रकारको बिरामीको आइसियु तथा भेन्टिलेटरको अभावमा मृत्यु भएपछि सरकारले चाँडो प्रक्रिया मार्फत भेन्टिलेटर खरिद गर्ने निर्णय गरेको प्रदेश २ का आन्तरिक मामिला तथा कानुन मन्त्री ज्ञानेन्द्र कुमार यादवले जनाए ।

प्रादेशिक अस्पतालको कोरोना विशेष अस्पतालमा रहेका ८ वटा आइसियु तथा २ वट भेन्टिलेटर कोरोनाका गम्भीर बिरामीको उपचार गर्नका लागि पर्याप्त नभएको भन्दै भेन्टिलेटर आवश्यक रहेको भन्दै गत वैशाख ८ गते नै ५० वटा भेन्टिलेटर खरिद गर्ने निर्णय भएको थियो । तर, सामानको अभाव तथा गुणस्तरीय सामानको आपूर्ति नदेखेर ढिलाइ भएको भए पनि अब ढिला नहुने जनाए ।

प्रादेशिक अस्पताल जनकपुरधाममा कोरोनाका बिरामीको उपचार प्रभावकारी भएका कारणले धेरै गम्भीर प्रकारको कोरोनाका बिरामीहरू पनि निको भएको छ ।

थप सुविधाहरू भएको खण्डमा मान्छेहरूको जीवन रक्षा गर्नका लागि थप मद्दत पुग्ने माग विभिन्न पक्षबाट आउन थालेपछि प्रदेश सरकारले शीघ्र प्रक्रियामार्फत सामानको आपूर्ति गर्न लागेको छ ।

यसका साथै भेन्टिलेटरसहितको कोरोना अस्पताललाई राम्रोसँग सञ्चालनका लागि स्वास्थ्यका कर्मचारी पनि लोकसेवा आयोगमार्फत भर्ना गर्ने जनाएको छ ।