शहिदनगरमा वडा कार्यालयको शिलान्यास

न्यूज ब्यूरो, जनकपुरधाम । धनुषाको शहिदनगर नगरपालिकामा आज (मँगलबार) एक कार्यक्रमबीच वडा कार्यालय भवनको शिलान्यास गरिएको छ ।

नगरपालिकाको वडा नं. २ को लागि चोराकोयलपुर मतौनामा वडा कार्यालय भवनको शिलान्यास गरिएको हो । वडा नं. २ का वडाध्यक्ष जैसी भिन्भारको अध्यक्षता तथा नगर प्रमुख उदय कुमार बरबरिया (यादव) को प्रमुख आतिथ्यमा शिलान्यास कार्यक्रम सम्पन्न गरिएको हो ।

आफ्नै वडा कार्यालय नहुँदा कार्य व्यवस्थापनमा कठिनाई भएको भन्दै वडा कार्यालय भवनको निर्माण सुरु गरिएको हो । २५ लाखको लागतमा निर्माण हुने सो वडा कार्यालय उपभोक्ता समिति मार्फत निर्माण गरिने जनाइएको छ ।

चालु आर्थिक वर्षको अन्तिमसम्म निर्माण गरिसक्नुपर्ने नगर प्रमुख बरबरियाले बताए । उनले वडा कार्यालय स्थानीय स्तरमै निर्माण भएपछि स्थानीय सरकारको काम कारवाहीमा तीव्रता आउने र व्यवस्थापन समेत उचीत ढँगले हुने बताए ।