जनकपुरः गँगुली आईसोलेशनका डाक्टर टिमलाई प्रादेशिक अस्पताल झिकाइए

न्यूज ब्यूरा्े, जनकपुरधाम । धनुषाको नगराईन नगरपालिका वडा नं. ९ गँगुली स्थित निर्माण गरिएको आईसोलेशनमा डाक्टरको चरम लापरवाहीको समाचारहरु बाहिरिएपछि टिमलाई प्रादेशिक अस्पताल झिकाइएको छ ।

आईसोलेशनमा डाक्टरहरु आफैं नगएर स्वीपर (सफाई कर्मचारी) मार्फत ज्वरो चेकको लागि पठाउने गरेको समाचार भाइरल बनेपछि हरकतमा आएका प्रदेश सरकारले आईसोलेशनमा खटेका डाक्टरको टिमलाई प्रादेशिक अस्पताल झिकाएको हो ।

धनुषा जिल्लाको कोभिड सँयोजक डा. जामुन सिँहले एक प्रेस विज्ञप्ति जारी गर्दै आईसोलेशनमा देखिएको लापरवाही पछि ड्युटिमा रहेको स्वास्थ्यकर्मी टिमलाई प्रादेशिक अस्पताल जनकपुरमा झिकाएर आईसोलेशनको लागि नयाँ स्वास्थ्यकर्मी टिम पठाउने निर्णय गरेको हो ।

नयाँ टिमलाई आजैदेखि पठाउने प्रेस विज्ञप्तिमा उल्लेख गरिएको छ । शनिबार गँगुली स्थित प्रदेश सरकारले निर्माण गरेको आईसोलेशनमा सफाई कर्मचारी पिपिई लगाएर सँक्रमितहरुको ज्वरो नाप्न गएको तथा एक साधारण व्यक्तिको नर्मल तापक्रम कति हो भनेर पनि थाहा नभएको बताएपछि खैलाबैला मच्चिएको थियो ।

आईसोलेशनमा खटेका स्वास्थ्यकर्मीको टिम आफैं नगएर स्वीपरलाई चेकजाँचको लागि पठाएपछि भिडियो भाईरल बनेको थियो ।