'झण्डा मधेशमा पनि जलाएको ' भनेपछि प्रेस काउन्सिलमा उजुरीको तयारी

न्यूज ब्यूरो, जनकपुरधाम । काठमान्डौंबाट प्रसारण हुने न्यूज २४ टिभी च्यानलले नेपालको झण्डा जलाएको सन्दर्भमा बनाएको एक रिपोर्टमा झण्डा मधेशका पनि बारम्बार जलाएको भनेपछि प्रेस काउन्सिलमा उजुरी दिन तयारी गरिएको छ ।

जनता समाजवादी पार्टीका युवा नेता राकेश रोशन यादवले केही दिन अघि एक म्यूजिक भिडियोमा मँगोलहरुले नेपालको झण्डा जलाएको सन्दर्भमा बनाएको रिपोर्टमा मधेशमा पनि बारम्बार नेपालको झण्डा जलाएको भनेपछि चौतर्फी आलोचना र मधेशप्रतिको दृष्टिकोण झल्काएको देखिएको छ ।

न्यूज २४ ले मधेशलाई लक्षित गर्दै दुई समुदायबीच सम्प्रादायिकता भडकाउने गरी रिपोर्ट बजाएको भन्दै प्रेस काउन्सिलमा उजुरी गरी कारवाहीको दायरामा ल्याउने तयारी युवा नेता यादवले गरेका छन् । उनले बारम्बार मधेशलाई लक्षित गरी सम्प्रदायिकता भडकाएर माफी माग्ने चलन झैं भएपछि अब चुप नबस्ने बताएका छन् ।

देशको झण्डा जलाएको म्यूजिक भिडियो पछि सबभन्दा पहिले तराई मधेशबाट नै आवाज उठन सुरु भएको र झण्डा जलाउनेलाई कारवाही दायरामा ल्याउनुका साथै देशद्रोहको मुद्दा लगाउन आवाज उठाइएको थियो ।

सरकारसँग असहमति भएपनि राष्ट्रिय झण्डा जलाउने कसैको अधिकार नरहेको बताउँदै मधेशी समुदायले यतिको विभेद खेपेपनि कहिले पनि देशको झण्डा जलाएनन् । उनले भने–“ एउटा राष्ट्रिय मिडियाले मधेश र पहाडमा द्वन्द्व प्रैदा हुने खालको सामाचार सामाग्री प्रशारण गर्नु हुदैन । यो मधेशको अपमान हो यो हामी कदापी पनि सहन गर्न सक्दैनौ ।”

न्युज २४ ले पटक–पटक मधेशको बदनाम गर्ने खालको सामाचार र कार्यक्रमहरु प्रस्तुत गर्दै आईरहेको बताउँदै उनले पटक पटक गल्ती गरेर माफी माग्दै आएपनि यसपाली कानुनी दायरा ल्याउने प्रतिवद्धता जाहेर गरे ।

केही महिना अगाडी लिपुलेक, लिम्पीयाधुर र कालापानीको विवाद नेपाल भारतबीच चर्केको बेला भारतमा केही मुस्लिम समुदायका व्यक्तिहरुले नेपालको झण्डा जलाएको थियो । त्यसको भोलिपल्ट मधेशको सप्तरीका नरसिँह हिन्दु सेनाका कार्यकर्ताहरुले नेपालको झण्डा जलाउने सँगठनको झण्डा जलाएर विरोध जनाएको थियो ।

नेपालको मधेशी समुदाय देशको असली राष्ट्रवादी भएपनि खोक्रो राष्ट्रवादीहरुले परीक्षा लिने गरेको आरोप यादवले लगाएका छन् । उनले भने–“हामीलाई देशभन्दा प्यारो केही छैन, हामीलाई सरकारसँग, राजनीतिक दलसँग असहमति छ, संविधानको केही बुँदासँग असहमती छ, तर, हाम्रो देशसँग कुनै असहमति छैन, हाम्रो देश हाम्रो गौरव र पहिचान हो । मधेशी मूलका नेपाली हौ हामी । गिद्दे नजर राख्नेलाई आँखा निकाल्ने साहस पनि छ हामीसँग । हामी देशबेचुवा राष्ट्रवादी होइनौ । सीमामा बिना हतियारको खटेर देश रक्षामा लागेका छौं । राष्ट्रवादीको नाममा ढोंक गरेका छैनौ ।”

यसका साथै, उनले काठमान्डौंबाट सँचालित मिडिया र मिडियाकर्मीले तराई मधेशलाई हेर्ने दृष्टिकोण, मधेशवासीलाई हेर्ने दृष्टिकोणमा नै सम्प्रादायिकताले भरिएको आरोप लगाएका छन् ।

यद्यपी, न्यूज २४ ले अधिकारिक रुपमा सो रिपोर्टप्रति क्षमायाचना गर्दै माफी मागिसकेको छ ।