धनुषाको धनौजीमा समुदाय स्तरमा कोरोना, प्रशासनलाई छैन मतलब

न्यूज ब्यूरो, जनकपुरधाम । धनुषा जिल्लाको धनौजी गाउँपालिकाको विभिन्न गाउँमा समुदाय स्तरमा कोरोना फैलिएको देखिएको छ । नेपाल भारतको सीमामै रहेको धनौजी कटैयाकोको अहिलेसम्मको रिपोर्ट अनुसार कोरोना समुदाय स्तरमा पुगेको छ ।

धनौजी गाउँपालिकाबाट विभिन्न समयमा ४५ जनाले गराएको स्वाब परीक्षणको क्रममा १३ जनामा कोरोना पुष्टि भएको छ । केही दिन अघि २ जनामा कोरोना पुष्टि भएको थियो भने आज पनि १३ जनामा कोरोना पुष्टि भएको छ । कुल १५ जनामा कोरोना पुष्टि भएको तथ्याँक छ ।

त्यसमध्ये केही जनप्रतिनीधि, सुरक्षाकर्मी र कर्मचारी समेत रहेको गाउँपालिकाको स्वास्थ्य शाखाले जनाएको छ । यद्यपी, स्थानीय प्रशासन भने यसबारे खासै चासो लिएका छैनन् ।

कोरोना सँक्रमित भेटिएको ठाउँमा सील गरिने प्रावधान बनाएपनि धनौजीमा मोटो सँख्यामा कोरोना सँक्रमित भेटाएको छ र प्रशासन अनिभिज्ञता देखाएको छ । जनप्रतिनीधि र कर्मचारीहरुमा समेत कोरोना देखिएपनि न त गाउँपालिकाको कार्यालय सील गरिएको छ न त बजार नै सील गरिएको छ ।

अहिले पनि धनौजी बजार र गाउँमा भारतबाट माछा बेच्नेहरु निर्वाध रुपमा आवतजावत गरिरहेको छ । सीमा सील भएको भनिएपनि सीमाका नेपालीहरु भारतीय माछा खाइरहेका छन् । समुदाय स्तरमा कोरोना फैलिएपनि प्रशासनले खासै चासो भने देखाएका छैनन् ।