विद्यालय व्यवस्थापन समिति विवाद : स्थानीय भन्छन्–विरोध दलितको होइन, प्रवृत्तिको हो

न्यूज ब्यूरो, सिरहा । मिर्चैया नगरपालिका–४ कुथनमास्थित आधारभूत विद्यालयको व्यवस्थापन समिति चयनको विषयमा देखिएको विवादको कारण दलित नभएको स्थानीयहरुले बताएका छन् ।

नगर शिक्षा शाखाले स्थानीय तथा अभिभावकलाई कुनै जानकारी नै नदिई एकलौटी तथा गुपचुप रुपमा समिति बनाएका कारण विवाद सिर्जना भएको स्थानीयहरुले बताएका हुन् ।

विद्यालयको व्यवस्थापन समिति चयनको लागि स्थानीय तथा अभिभावकहरुलाई जानकारी गराएर भेला गराई समिति चयन गर्नुपर्ने प्रावधान छ । तर, नगर शिक्षा शाखाले विद्यालयको प्रांगनसमेत नभई अन्यत्रै ठाउँमा सीमित व्यक्तिहरुको उपस्थितीमा गुपगुच तरिकाले निकट मानिने भवानी महरालाई अध्यक्ष बनाएको उनीहरुको कथन छ ।

यसअघि दलित भएकै कारण अध्यक्षमा स्वीकार नगरेको भनि समाचार प्रकाशित हुँदा स्थानीयहरुले असन्तुष्टी जनाएपछि न्यूज ब्यूरोले यसको थप फ्लोअप गर्दा भित्री रहस्य बाहिर आएको हो । ‘पाँच जनाको समितिमा ३ जना दलितलाई नै हामीले सदस्यका लागि अगाडि सारेका छौं,’ एकजना स्थानीयले भने, ‘अध्यक्ष बनाइएकी भवानी महरा यसअघि विभिन्न निकायमा पदाधिकारी भइसक्नुभएको छ, अब यहाँका अन्य दाबेदार अध्यक्ष बनोस् र अभिभावकले सर्वसम्मत समिति बनाओस् भन्ने हाम्रो माग हो ।’

सम्बन्धित निकायले एकलौटी रुपमा स्थानीयलाई कुनै जानकारी नै नदिई गैरकानुनी रुपले व्यवस्थापन समिति बनाएपछि विद्यालयमा तालान्दी गर्न बाध्य भएको स्थानीयको भनाई छ । ‘हामी पनि दलितकै उत्थानमा लागेको छौं, यहाँ विरोध दलितको नभई प्रवृत्तिको हो,’ एक स्थानीयले भने ।

नगर शिक्षा समितिले गुपचुप रुपमा समिति बनाएको थाहा पाएपछि स्थानीयहरुले विद्यालयमा तालाबन्दी गरेका थिए । तर, प्रमुख जिल्ला अधिकारीको निर्देशनमा प्रहरीले तालाबन्दी खोलेर बसेर विवाद मिलाउन भनेपछि बुधबार ताला खोलिएको थियो ।