मन्त्री यादव भन्छन् : 'कर्तव्य निर्वाह गर्दागर्दै संक्रमित भएछु, आत्तिनु पर्दैन'

न्यूज ब्यूरो, जनकपुरधाम । प्रदेश २ का आन्तरिक मामिला तथा कानुनमन्त्री ज्ञानेन्द्र कुमार यादवले कर्तव्य निर्वाह गर्दागर्दै आफू कोरोना संक्रमित भएको बताएका छन् ।

तर, त्यसका कारण आत्तिनु नपर्ने र आफ्नो स्वास्थ्य अवस्था सामान्य रहेको जानकारी दिएका छन् । एक कार्यक्रममा सहभागी भएर काठमाडौंबाट फर्केपछि मन्त्री यादवले पीसीआर टेस्टका लागि साउन १९ गते स्वाब दिएका थिए ।

बुधबार आएको रिपोर्टमा कोरोना पोजेटिभ पाइएको हो । न्यूज ब्यूरोसँगको फोन संवादमा मन्त्री यादवले भने, ‘काठमाडौंबाट फर्केर आएपछि पीसीआर टेस्टका लागि स्वाब दिएको थिएँ, रिपोर्ट पोजिटिभ पाइएको छ ।’

मन्त्री यादव कोरोना संक्रमण भएको पाइएपछि आफूलाई मन्त्रालयको निवासमै आइसोलेट गरेको जनाएका छन् । आफ्नो स्वास्थ्य अवस्था सामान्य रहेको मन्त्री यादवले जानकारी दिए ।

मन्त्री यादवले प्रदेशबासीलाई अत्तिहाल्नु नपर्ने तर, सतर्कता अपनाउन भनेका छन् । ‘कर्तव्य निर्वाह गर्दागर्दै संक्रमित भएछु, मन्त्री यादवले भने, ‘तर तपाईहरु नआत्तिनोस्, म स्वस्थ नै छु, कोरोना पराजित गरी फर्किनेछु ।’

जनताकै लागि काम गर्दागर्दै संक्रमित हुनु परेकामा आफू कहीँ कतै दुःखी नभएको उनले बताए । मन्त्री यादवले भने, ‘पीर त मेरा जनताको स्वास्थ्यको छ, कसैलाई पनि केही नहोस् ।’ जनताको सेवा अनि आफ्नो कर्तव्य पूरा गर्ने क्रममा आफू भाइरसको संक्रमणमा परेपनि प्रदेशबासीलाई सुरक्षा सतर्कता अपनाउन अनुरोध गरेका छन् ।

मन्त्री यादवले दुई सातायता आफ्नो सम्पर्कमा आएका व्यक्तिहरुको कन्ट्याक्ट ट्रेसिङ हुने हुँदा क्वारेन्टाइनमा नै बस्नमा लागि अनुरोध गरेका छन् ।

यस्तो छ ट्राभल र कन्ट्याक्ट हिस्ट्री

मन्त्री यादवको कन्ट्याक्ट हिस्ट्रीमा प्रधामन्त्रीदेखि प्रहरी महानिरिक्षकसम्म रहेको देखिएको छ ।

कोरोना संक्रमणको रिपोर्ट आउनु पूर्व उनले काठमाडौंमा रहँदा प्रधानमन्त्री केपीशर्मा ओलीदेखि गृहमन्त्री, गृह सचिव, प्रहरी महानिरीक्षक र ६ वटै प्रदेशका आन्तरिक मामिला तथा कानून मन्त्रीहरुसंग समेतलाई भेटघाट गरेको थियो ।

कोरोना संक्रमित पुष्टि हुनुपूर्व गत साउन १८ गते काठमाडौंमा उच्च स्तरीय भेटघाट गरेका थिए । काठमाडौंमा प्रधानमन्त्री निवास बालुवाटारमा संगठन तथा व्यवस्थापन सर्वेक्षण प्रस्ताव पारित गर्न प्रहरी समायोजन सम्बन्धी समन्वय समितिको बैठकमा सहभागी भएका मन्त्री यादवको देशकै शीर्ष नेताहरूसँग भेटघाट भएको थियो ।

यस्तै, एक साताअघि मन्त्र यादव, भौतिक पूर्वाधार मन्त्री जितेन्द्र सोनल, उद्योग वन, पर्यटन तथा वातावरण मन्त्री रामनरेश रायसहितको टोली सिरहाको कमलानदी, घुर्मी नदी, बतहा नदी, बलान नदी, गागन नदीलगायतको क्षती निरिक्षण गर्न सिरहासमेत आएका थिए ।

सो क्रममा सिरहाका प्रमुख जिल्ला अधिकारी प्रदिपराज कंडेल, प्रदेश सांसदहरू, कार्यलय प्रमुखहरू, स्थानीय तहका प्रमुखहरू, राजनीतिक दलका प्रतिधिधिहरू र केही पत्रकारहरू समेत सहभागी थिए ।