आज साँझ जनकपुरमा दिपावली

न्यूज ब्यूरो, जनकपुरधाम । भारतको अयोध्यामा राम मन्दिरको भूमि पूजनको अवसरमा जनकपुरमा दीपावली मनाउ आग्रह गरिएको छ ।

हिन्दु परिषद एवम जानकी मन्दिरका छोटे महन्थ राम रोशन दासले सार्वजनिक रुपमा अपिल गर्दै राम मन्दिर निर्माणको लागि आज भएको भूमि पूजनको अवसरमा सम्पूर्ण मिथिलाञ्चलवासीलाई दीप प्रज्वलन गर्न आग्रह गरेका हुन् ।

दासले जगत जननी माता जानकीको ससुराली अयोध्यामा उनको घर बन्न लागेको भन्दै खुसीयाली र हर्षको क्षणमा दीपावली मनाउन आग्रह गरेका छन् । सयौं वर्षदेखि विवादित रहेको अयोध्याको राम भूमिमा मन्दिर निर्माणको लागि आज (बुधबार) भारतीय प्रधानमन्त्री नरेन्द्र मोदीले भूमि पूजन गरेका हुन् ।

सोही अवसरमा जनकपुरको जानकी मन्दिरमा आज २ घण्टा विशेष भजन किर्तन गरिएको छ भने साँझ ६ बजे सबैलाई दीप प्रज्वलन गरी दीपावली मनाउन आग्रह गरिएको छ । जनकपुरमा कोरोना भाइरसको सँक्रमणलाई मध्यनजर गर्दै एक साताको लागि कर्फ्यू लगाएको हो ।

निषेधाज्ञाको बीच पनि आफ्नो घरमै बसी दासले दीपावली मनाउन आग्रह गरेका हुन् । आजको दिनलाई विश्वकै हिन्दु धर्मावलम्बीहरुको लागि ऐतिहासिक दिनको रुपमा चिनिने बताइएको छ ।