अस्पतालमै दम तोडेका राजु सदाको परिवारको बिच्चली, घनघोर बर्षामा प्लास्टिको झुपडी

न्यूज ब्यूरो, जनकपुरधाम । अस्पतालको लापरवाहीका कारण उपचार नपाएर अस्पतालमै अन्तिम साँस लिएका धनुषाका राजु सदाको परिवारको विच्चली भएको छ ।

आर्थिक रुपमा अति विपन्न राजु सदाको बुवा अशेश्वर सदा सहित उनको परिवार अहिले बिच्चलीमा परेको छ । निरन्तर परेको वर्षामा प्लास्टिकको झुपडीमा गुजारा गर्न बाध्य भएका छन् ।

मृतक राजु त्यो घरको छोराछोरीमध्ये सबैभन्दा जेठा सदस्य थिए । घरको जेठो छोराको मृत्यु भएपछि घर परिवार अपाङग जस्तै भएको छ । आशाको किरण छोरो राजुको निधनले परिवारमा सवै शोकाकुल छन् ।

उनीहरु सरकारी ऐलानी २ धुर जति घरेरीमा फुसको झुपडी घरमा गुजारा गर्दै आएका छन् । घर सानो झुपडी भएकोले सुत्न बस्न र खाना बनाउन समेत ठाउ पुग्दैन । घरको आँगनमा पलास्टीको झुपडी र एउटा मचान (खाट) बनाएर सुत्ने गरेको छ ।

छोरीहरुलाई घरमा र आफुहरु बाहिर मचानमै रात बिताएर गुजारा गर्दै आएका उनका परिवार अहिले घनघोर वर्षामा पनि बाहिर कठयाँग्रिन बाध्य भएका छन्। “घरमा अन्न छैन कसरी किरिया कर्म गर्ने ? उनकी आमा चिन्ता व्यक्त गरिन ।

छोरोको सम्झना आउने वितिकै उनी भक्कानिए । उनका अनुसार क्वारेन्टाइनमा छोरो विरामी भएको थाह पाएपछि गाउँका सवै नेताहरुलाई गुहार लगाइन तर कोइ पनि सुनवाइ गरेन । कोरोनाको आशंकामा कसैले सहयोग गर्न मानेन । कोरोनाकै आशंकामा समयमा उचित उपचार नपाएर राजुको मृत्यु भएकोले पिडित परिवार न्यायको लागि सवैसँग हार गुहार गरेका छन् ।

मानव सुचकाँको सबभन्दा तल्लो जीवनस्तर (अति विपन्न) भनिएको राजू सदाको परिवारलाई तराइ मानवअधिकार रक्षक संजाल (थर्ड एलाइन्स) ले आर्थिक सहयोग गरेको छ ।

थर्ड एलाइन्सका प्रादेशिक संयोजक विनोद महरा सहित उनको टिमले मृतक राजु सदाको घरमै पुगेर उनका परिवारलाई नगद १० हजार रुपैया सहयोग गरेको हो ।

पीडित परिवारले न्याय र क्षतिपुत्र्तिको लागि मानवअधिकारकर्मीहरुसँग समेत आग्रह गरेका छन् । घटनाको सत्य तथ्य बुझ्न र पिडित परिवारलाई दुखको यस घरीमा केही आर्थिक सहयोग होस र केहि भएपनि राहत होस भन्ने उद्देश्यले मानवअधिकारकर्मीहरु थर्ड एलाइन्सका कानूनी सल्लाहकार भोगेन्द्र यादव, नेपाल मानवअधिकार संगठन क्षेत्रीय अध्यक्ष एवं मानवअधिकारकर्म विरेन्द्र कर्ण र अधिकारकर्मी अविनाश साहं समेत मृतक राजु सदाको घर पुगेका थिए ।

मानवअधिकारकर्मीहरु पिडित परिवारको गाउँमा पुग्दा स्थानीयहरु जम्मा भइ न्यायको लागि पहल गरि दिन समेत आग्रह गरेका थिए ।

हंसपुर नगरपालिका वडा नं.७ प्रसाही निवासी अशेश्वर सादाको छोरा १६ वर्षीय राजु सदाको प्रादेशिक अस्पताल जनकपुर अन्र्तगत कोरोना अस्पतालको आइसोलेसनमा २०७७ असार ९ गते विहान ३ः०० वजे मृत्यु भएको थियो ।

अस्पतालले असार ८ गते राजुको अवस्था विग्रेपछि पिडित परिवारलाई खवर गरेका थिए । क्रिटिकल अवस्थामा इमरजेन्सीमा भर्ना गरे राजुको ज्यान भने जोगिएन ।

शवको बिना पोष्टमार्टम पिडित परिवारलाई जिम्मा लगाएर लैजा भनेपछि पिडित परिवार आफै शव वाहन भाडा गरेर शव लगेका थिए । शवको असार ९ गते नै अन्त्येष्टी गरेको पिडित परिवारजनले बताए । राजु १६ महिना पहिले रोजगारीको लागि भारतको मदरास पुगेका थिए ।

त्यहाँ उनी होटलमा काम गर्थे । कोभिड–१९ का कारण भारत सरकारले लक डाउन गरेपछि होटलहरु बन्द भयो । भारतबाट राजु सदा सहित ९ जनाको समुहमा ०७७ जेठ १४ नेपाल फर्के ।

उनीहरुलाई हंसपुर नगरपालिकाकै नौवाखोर अस्पतालमा क्वारेन्टाइनमा राखियो । १४ दिनसम्म क्वारेन्टाइन बसाइपछि ७ जनालाई घर पठाइयो र २ जना राजु सदा र अरुण सदाको आरडिटी रिपोर्ट पोजिटिभ आएको भन्दै हंसपुर नपा स्थित सो क्वारेन्टाइनले प्रादेशिक अस्पताल जनकपुर पठायो ।

उनीहरुको आइसोलेशनमा राखि उपचार गरिरहेको अस्पतालले बताए पनि ०७७ असार ९ गते विहान ३ वजे राजुको मृत्यु भयो ।