सिरहा मिर्चैयाका वडाध्यक्ष 'यादव' निलम्बनमा !

न्यूज ब्यूरो, सिरहा । प्रदेश नं. २ को सिरहा जिल्लाको एक स्थानीय तहका वडाध्यक्ष निलम्बनमा परेका छन् ।

सिरहा जिल्लाको मिर्चैया नगरपालिका वडा नं. ७ का वडाध्यक्ष राम कुमार यादव निलम्बनमा परेका हुन् । साबिक फूलबारी गाविस वडा नं. ७ ख को कित्ता नम्बर १९३, १९४, २०९, २१०, ३०४९ र ३०५० का बाटो भएको जग्गाहरु बिक्री गर्दा बाटो नभएको भन्ने सिफारिस गरी राजस्व छली गरेको भन्दै आरोप पत्र दायर गरिएपछि निलम्बनमा परेका हुन् ।

अख्तियार दुरुपयोग अनुसन्धान आयोगले अनुसन्धानबाट वडाध्यक्ष यादव सहित अन्य केही व्यक्तिहरु समेत भ्रष्टाचारजन्य कार्य गरेको प्रमाणित हुन आएको भन्दै अख्तियारले कारवाहीको लागि आरोपत्र दायर गरेको हो ।

वडाध्यक्ष यादवले हस्ताक्षर गरेको पत्रले साविक फूलवरिया गाविस वडा नं. ७ (ख) कित्ता नम्बर १९४ ज.वि. (०–०–१३), कित्ता नम्बर २०९ ज. वि. (०–०–१६), कि.नं. ३०४९ ज.वि. (०–०–८) विगाह जग्गाहरुमा घरबाटो केही नभएको भनी तथा त्यहीको कित्ता नम्बर २१० ज.वि. (०–०–१५०, कित्ता नम्बर १९३ ज. वि. (०–१–३०, कि.नम्बर ३०५० ज.वि. (०–०–८) क्षेत्रफल विगाह जग्गाहरुमा बाटो नभएको भनी मालपोत कार्यालय सिरहालाई गलत सिफारिस गरेको पुष्टी भएको अख्तियारले जनाएको छ ।

अख्तियार दुरुपयोग अनुसन्धान आयोगका प्रवक्ता प्रदीप कोईरालका अनुसार, उक्त कार्य भ्रष्टाचार निवारण ऐन, २०५९ को दफा ९ बमोजिमको कसुर गरेको देखिएकोले र उक्त गलत व्यहोराको सिफारिसबाट नेपाल सरकारलाई प्राप्त हुने रकममा मालपोत कार्यालय सिरहाको पारित लिखतबाट रजिष्ट्रेशन दस्तुर रु ४०,७७७।– (चालीस हजार सात सय सतहत्तर) हानिनोक्सानी पुग्न गएकोले निज राम कुमार यादवको उक्त कार्य ऐ. ऐनको दफा ८ को उपदफा (३) बमोजिमको समेत कसुर भएको स–प्रमाण पुष्टि भएको देखिंदा उनलाई भष्ट्राचार निवारण ऐन, २०५९ को दफा ९ तथा बिगो रु। ४०,७७७।– कायम गरी सोही ऐनको दफा ८ उपदफा (३) बमोजिम सजाय हुन मागदाबी लिइएको हो ।

सोही प्रकरणमा जग्गा खरिदकर्ता सुरेश कुमार महतोले मिर्चौया नगरकार्यपालिकाको कार्यालय वडा नं. ७ को पत्रबाट कित्ता नम्बर १९३, २१०, ३०५०, १९४, २०९, ३०४९ का जग्गा घरबाटो भएकोलाई उक्त कित्ता जग्गाहरुमा घरबाटो नभएको भनी वडाध्यक्ष यादवसँगको मिलेमतोमा गलत सिफारिस गरेको बताइएको छ ।

सो काण्डमा उक्त किता नम्बरका जग्गाहरु महतोले खरिद गर्ने क्रममा रजिष्ट्रेशन दस्तुर रु. ४०,७७७।– कम राजस्व दाखिला गरी नेपाल सरकारलाई हानिनोक्सानी पुर्‍याएको देखिइएको भन्दै महतो उपर पनि भ्रष्टाचार निवारण ऐन, २०५९ को दफा ८ को उपदफा (४) को कसुर हुनका साथै दफा ९ को कसुरको मतियार हुने कसुर भए गरेको स–प्रमाण पुष्टि भएको बताइएको छ ।

खरिदकर्ता भनिएको महतोबाट पनि ४० हजार ७ सय ७७ (चालिस हजार सात सय सत्हत्तर) बिगो कायम गरी सोही ऐनको दफा ८ को उपदफा ९४० बमोजिम असूल उपर गरी जफत हुन पाउन समेत मागदाबी गरिएको हो ।

यसका साथै सोही जग्गा प्रकरणमा विक्रीकर्ता रामेश्वर साह, दिप नारायण साह र सत्य नारायण प्रसाद साहले मिर्चैया नगरपालिकाको कार्यालय वडा नं. ७ को घरबाटो सिफारिस पत्रमा कित्ता नं. १९४, २०९, ३०४९ को घर बाटो नभएको भनी रामेश्वर साहले र कित्ता नं. १९३, २१०, ३०५० को घर बाटो नभएको दिप नारायण साह र सत्य नारायण प्रसाद साहले वडाध्यक्ष रामकुमार यादवसँगको मिलेमतोमा गलत सिफारिस गराई भ्रष्टाचार निवारण ऐन, २०५९ को दफा ९ को कसुरको मतियार हुने कसुर प्रमाणित हुन आएकोले उनीहरु उपर पनि विशेष अदालत काठमान्डौंमा आरोप पत्र दायर गरिएको हो ।