स्वीचमा करेन्ट लागेर एक बालिका ठहरै !

न्यूज ब्यूरो, सिरहा । सिरहामा कल (ह्याण्डपाइप) को स्वीचमा करेन्ट लागेर बालिकाको ज्यान गएको छ ।

सिरहाको नरहा गाउँपालिका वडा नं. २ पानबारी बस्ने स्थानीय राम जुलुम यादवकी अन्दाजी बर्ष १४ की छोरी सम्झना कुमारी यादवको ज्यान गएको जिल्ला प्रहरी कार्यालय सिरहाले जनाएको छ ।

आफ्नै कलमा नुहाउन गएकी सम्झनालाई त्यसमा जडान गरिएको मोटरमा प्रयोग भएको स्वीचबाट करेन्ट प्रवाह भई तत्काल उनको ज्यान गएको प्रहरीले जनाएको छ ।

विहिबार अपरान्ह करिब ५ बजेको समयमा नुहाउन गएकी सम्झनाले बाल्टीमा पानी भर्न मोटरसको स्वीच अन गरेकी थिइन । बाल्टीमा पानी भरिसकेपछि स्वीच अफ (बन्द) गर्न जाँदा स्वीचमा करेन्ट लागेर उनको ज्यान गएको हो ।

स्वीच दबाएपछि उनलाई करेन्ट लागेर मृत्यू भई त्यही लडेको देखेपछि उनकी आमाले छिमेकीहरुलाई बोलाएकी थिइन । उनको शवलाई पोष्टमार्टमको लागि जिल्ला अस्पताल सिरहा लगिएको हो ।