कल्याणपुर : पक्की सकड बनेपछि स्थानीय दंग

न्यूज ब्यूरो, सिरहा । सिरहाको कल्याणपुर नगरपालिका–९, डुमरीमा २ सय ३५ मिटरको आरसिसी सडक निर्माण भएको छ ।

सिरहा निर्वाचन क्षेत्र नम्बर ४ (ख) बाट निर्वाचित भएका प्रदेश २ सरकारका उद्योग, पर्यटन, वन तथा वातावरण राज्यमन्त्री सुरेश कुमार मण्डलको संसदीय विकास कोषबाट उक्त पक्की सडक निर्माण भएको हो ।

यसअघि सडकमा ग्राभेलसमेत नहुँदा वर्षायाममा घर बाहिर निस्कनसमेत स्थानीयलाई मुस्किल पर्ने गरेको थियो । गत वर्ष नगरपालिकाले गाउँको केहि स्थानमा आरसिसी ढलान गरेपनि यस टोलमा नहुँदा सर्वसाधारण समस्या खेप्दै आएका थिए ।

तर, अब भने २० लाख लागतमा पक्की सडक नै निर्माण भएपछि स्थानीय दंग परेका छन् । वर्षायाममा सडक हिलामय हुँदा खेतबारी तथा गाउँमा पनि हिड्न कठिनाई झेलिरहेका स्थानीयहरु पक्की सडक बनेपछि हर्षित छन् ।

स्थानीय सरकारले गर्नुपर्ने काम राज्यमन्त्री मण्डलले गरेकोमा स्थानीयले आभार व्यक्त गरे । ‘यो काम स्थानीय सरकारको हो, तर गरेन,’ एकजना स्थानीयले भने, ‘उहाँप्रति हामी गाउँले आभारी छौं ।’

तत्कालिन राजपाका कल्याणपुर–९ का वडा संयोजकसमेत रहेका स्थानीय बिनोद यादवले स्थानीय जनप्रतिनिधिले स–साना कामप्रति समेत चाँसो नलिँदा अन्य ठाउँको हालत उही रहेको बताए । उनले स्थानीय सरकारले यस्ता कामप्रति चाँसोका साथ अग्रसर हुनुपर्ने धारणा राखे ।