जनकनन्दिनी गाउँपालिकाको वडाध्यक्षले खराब चामल बाँडेपछि राहत फिर्ता

न्यूज ब्यूरो, जनकपुरधाम । धनुषाको जनकनन्दिनी गाउँपालिकाको एक वडामा गुणस्तरीयहिन चामल वितरण गरेपछि राहत फिर्ता गरिएको छ ।

जनकनन्दिनी गाउँपालिकाको वडा नं. १ स्थित रहेको इनरबा र मलहनियाँ टोलमा वडाध्यक्ष धर्मेन्द्र गोईतले गुणस्तरीयहिन चामल सहितको राहत वितरण गरेपछि स्थानीयहरुले राहत फिर्ता गरिदिएको छ ।

१० किलो चामल, १ किलो दाल र १ किलो आलुको पोका गरी इनरबाको करिब २०० परिवारलाई राहत वितरण गरेपछि प्रदान गरिएको चामल गुणस्तरीहिन (खुदी भएको) वितरण गरेपछि राहत फिर्ता गरिएको हो ।

वडा नं. १ कै इनरबामा आईतबार राहत वितरण गरिएको थियो भने सोमबार मल्हनियाँमा वितरण गरिएको थियो । राहतमा चामलको सट्टा खुदी भएको चामल वितरण गरेपछि स्थानीयहरुले गाउँपालिकाको कार्यालयमा उजुरी गरेको थियो ।

न्यायिक समितिकी सँयोजक समेत रहेकी गाउँपालिकाकी उप प्रमुख भारती कार्कीले त्यहाँका सर्वसाधारणहरुले गुनासो र निवेदन दिएपछि अनुगमनको लागि गाउँपालिकाबाट मान्छे पठाएर मुचुल्का उठाएको बताइन् ।

उनले राहत वितरण गरिएको ठाउँमा तथा वितरण गरिरहेकै अवस्थामा पुग्दा गुणस्तरीयहिन देखिएको भन्दै सोही अनुरुप कारवाही प्रक्रिया अगाडी बढाउने बताइन् ।

उप प्रमुख कार्कीले गाउँपालिकाको सबै वडामा ५ ५ लाख रुपैयाँ दोस्रो चरणको राहतको लागि पठाएको भन्दै गाउँपालिकाबाट कुनै पनि समाग्री खरिद नगरिएको बताइन् ।

वडाध्यक्ष गोईतले गाउँपालिकाबाट नै राहतको पोका खरिद गरिएको भनेपछि उपप्रमुख कार्कीले गाउँपालिकाबाट कुनै प्रकारको राहत खरिद नभएको बताइन् ।

उनले भनिन्–“गाउँपालिकाबाट हामी कुनै प्रकारको राहत खरिद गरेका छैनौ । हामीले प्रत्यके वडामा ५ ५ लाख रुपैयाँको चेक मात्र पठाएका छौं । वडाध्यक्षले गाउँपालिकाको नाम लिएकोमा आपत्ति प्रकट गर्न चाहन्छु । जनताहरुले राहत फिर्ता गरिदिएको छ । अब कानुनी प्रक्रिया बमोजिम अघि बढनुपर्ने हुन्छ । राहतको नाममा स्वास्थ्यसँग खेलवाड गर्ने अधिकार कसैको छैन ।”

यता, यो सन्दर्भमा वडाध्यक्ष धर्मेन्द्र गोईतसँग सम्पर्क गर्न खोज्दा उनले फोन उठाएनन् ।