बोर्डरमा शसस्त्र प्रहरीको गोलीले एक भारतीयको मृत्यू !

न्यूज ब्यूरो, जनकपुरधाम । नेपाल भारतको सीमामा सशस्त्र प्रहरीले चलाएको गोली लागेर एक भारतीय नागरिकको घटनास्थलमै मृत्यू भएको छ ।

भारतबाट नेपाल प्रवेश गर्न खोज्दा प्रहरीले उनलाई रोकेको थियो । लकडाउन तथा सीमा सीलका कारण बोर्डरमा आवतजावत बन्द गरिएपनि जबरदस्ती प्रवेश गर्न खोज्दा गोली चलाइएको हो ।

सर्लाहीस्थित नेपाल–भारत सीमा क्षेत्रमा सशस्त्र प्रहरीले गोली चलाउँदा एक भारतीय नागरिकको मृत्यू भएको जिल्ला प्रहरी कार्यालय सर्लाहीले जनाएको छ ।

बोर्डरमा आएर केही भारतीय नागरिकहरुले नेपाल प्रवेश गर्न खोजेका थिए । सो क्रममा सशस्त्र प्रहरीको कडा निगरानीको बेला रोक्ने क्रममा विवाद भएको थियो ।

प्रहरीको हतियार खोसेपछि सशस्त्र प्रहरीले गोली चलाउन बाध्य भएको थियो । सो क्रममा सितामढी, लालबन्दीका ४५ वर्षीय लगन रामलाई पनि पक्राउ गरिएको हो ।

प्रारम्भमा भारतबाट २०–२५ जनाको टोली आएर संग्रामपुरस्थित बोर्डर आउट पोष्ट (बीओपी) मा विवाद गरेका थिए ।

उनीहरुलाई फर्काएको केहीवेरमा करिब एक सय जनाको टोली आएपछि विवाद बढेको प्रहरीको भनाइ छ ।

त्यसक्रममा स्थितिलाई नियन्त्रणमा लिन १० राउण्ड हवाई फायर पनि गर्नुपरेको सशस्त्र प्रहरीको भनाइ छ ।

सर्लाहीका प्रमुख जिल्ला अधिकारी मोहनबहादुर जिसीले भारतबाट तस्करी गर्न आएका मानिससँग सीमा क्षेत्रमा सशस्त्र प्रहरीको झडप भएपछि सो घटना भएको बताए ।

सशस्त्र प्रहरी उपर भारतीय नागरिकहरुले जाई लागेपछि बाध्यवंश प्रहरीले गोली चलाएर स्थिति नियन्त्रणमा लिएको बताइएको छ ।