धनुषाको कमला नगरपालिकाको ६ जनामा कोरोना

न्यूज ब्यूरो, जनकपुरधाम । धनुषाको कमला नगरपालिकाको ६ जनामा कोरोना पुष्टि भएको छ ।

गत जेठ २२ गते सँकलन गरिएको स्वाब परीक्षणपछि मँगलबार दिएको रिपोर्ट अनुसार ६ जनामा कोरोना पुष्टि भएको हो ।

कमला नगरपालिकको वडा नं. २ माचिका २ जना, कमला नगरपालिका वडा नं. ३ पर्सा र लगमा गरी २ जना तथा कमला नगरपालिका वडा नं. ६ को पनि २ जनामा कोरोना पुष्टि भएको हो ।

कमला नगरपालिकाका क्वारेन्टाइन व्यवस्थापनका सँयोजक एवम् स्वास्थ्य शाखा प्रमुख सत्यनारायण ठाकुरका अनुसार ६ जनामा पिसिआर पोजिटिभ पाइएको हो ।

उनीहरुलाई आजै धनुषाको सपही स्थित स्वास्थ्य निर्देशनालयमा राखिएको आईशोसेलनमा लगिएको जनाइएको छ । उनीहरु सबै जना भारतबाट आएका थिए ।

कमला नगरपालिका कार्यालयको नजिकै विद्यालय भवनमा राखिएको क्वारेन्टाइनबाट कोरोना पोजिटिभ पाइएको हो । यसअघि उनीहरु खुल्ला घुम्दै आएका थिए ।

क्वारेन्टाइनमा बेड क्षमताका साथै सँख्या अत्यधिक भएपछि व्यवस्थापनमा समेत समस्या भएको थियो । नगरपालिकाको तर्फबाट कडाई गरिएपनि भित्र उनीहरु समाजिक दुरी कायम भने व्यवस्थापन गर्न सकेको थिएनन ।