जनकपुरमा यी ठाउँ बाहेक सबै पसलहरु खोल्ने सहमति

न्यूज ब्यूरो, जनकपुरधाम । लकडाउनका कारण प्रभावित भएको जनकपुर बजारको सबै पसलहरु खोल्ने सहमति भएको छ ।

जिल्ला प्रशासन कार्यालय धनुषामा आज बसेको सुरक्षा समितिको बैठकबाट जनकपुरको सम्पूर्ण पसलहरु खोल्ने निर्णय गरिएको हो ।

धनुषाका प्रमुख जिल्ला अधिकारी कोषहरी निरौलाका अनुसार, जीमखाना, सिनेमा हल, सैलुन लगायत बढी भीड हुने ठाउँ बाहेक पसलहरुमा सबै खोलिने सहमति भएको हो ।

सुरक्षा समितिको बैठकमा स्थानीय व्यापारीहरुको समेत सहभागितामा सम्पन्न बैठकमा विहानदेखि अपरान्ह १२ बजेसम्म सम्पूर्ण पसलहरु खोल्ने सहमति गरिएको हो ।

शनिबार विहानदेखि गर गहना, किराना, कपडा पसल, मोबाईल पसल, फलफूल पसल लगायतका सबै पसलहरु खोलिने भएको छ ।

१२ बजेपछि सबै पसलहरु बन्द गर्नुपर्ने तथा सो नगरे प्रहरी प्रशासनले कारवाही समेत गरिने जनाइएको छ ।

१२ बजेसम्म खोलिने सम्पूर्ण पसलहरुमा कोरोना भाइरसबाट बच्न सेनिटाइजर वा साबुनपानी, ग्लोब्स, मास्क अनिवार्य राख्नुपर्ने, दुरी बनाएर मात्र किनमेल गर्न पाउने गरी प्रावधान समेत लागू गरिएको हो ।