नेपालमा स्वास्थ्य संकटकाल घोषणाको तयारी

न्यूज ब्यूरो, काठमाडौं । स्वास्थ्य तथा जनसंख्या मन्त्रालय स्वास्थ्य संकटकाल घोषणाको तयारीमा जुटेको छ ।

दुई हजार ३ सय व्यक्तिलाई कोरोना भाइरस संक्रमण भएपछि मन्त्रालय यस्तो तयारीमा जुटेको हो । देशमा स्वास्थ्य संकटकाल घोषणा गर्न प्रक्रिया अघि बढाएको कोभिड इन्सिडेन्ट कमान्ड सिस्टम प्रमुख डा. गुणराज लोहनीले बताए ।

हेल्थ सेक्टर इमर्जेन्सी रेस्पोन्स प्लानमा दुई हजारभन्दा बढी व्यक्तिलाई कोरोना भाइरस संक्रमण भएपछि संकटकाल घोषणा गर्न सकिने व्यवस्था छ । लोहनीका अनुसार मन्त्रालयले सोही व्यवस्थाअन्तर्गत संकटकाल घोषणा गर्न लागेको हो ।

नेपालमा कोरोना संक्रमितको संख्या २३ सय पुगेको छ । योसँगै संक्रमणको दर दोस्रो चरणमा प्रवेश गरेको छ । दुई सय ७८ जना संक्रमणमुक्त भएका छन् । दुई हजार २२ जनाको उपचार भइरहेको छ ।