जनप्रतिनिधिको दवावमा प्रतिपक्षीलाई 'टर्चर' दिँदै प्रहरी

न्यूज ब्यूरो, सिरहा । जनताको करबाट चलिरहेको सरकारी निकायले देशका सबै नागरिकलाई समान प्राथमिकता साथ हेर्नुपर्ने हो ।

तर, नेपालमा भने ती निकायहरुमा पावरवालाको हावी र हालीमुहाली रहेको कुरा लुकेको छैन । प्रहरी प्रशासन त झन भित्राभित्रै पावरवालाहरुसँग साँठगाँठ राख्ने र उनीहरुलाई अपराधिक गतिविधिमा समेत संरक्षण दिँदै सहयोग गर्दै आएको यथार्थ यहाँ अनौठो होइन ।

मिर्चैया नगरपालिका वडा नम्बर ३ बलुवामा जेठ १८ गते राती काँग्रेस र माओवादी कार्यकर्ताबीच विवाद भयो । विवाद भएको बारे प्रहरीमा खबर पुग्यो । प्रहरीले विवादमा संलग्नलाई खोजतलास गर्नुपर्ने उसको धर्म र कर्तव्य हो ।

तर, घटनामा संलग्न नै नरहेका व्यक्तिलाई कसैको उक्साहट र दवावमा जवर्जस्ती तनाव दिनु प्रहरीको धर्म विपरित कार्य हो । सो घटनामा जनप्रतिनिधिहरुको दवावमा प्रहरीले तत्कालिन राजपाका स्थानीय नेता खगेश्वर गोहिवारलाई अनावश्यक मानसिक तनाव दिँदै आएको तथ्य बाहिर आएको छ ।

वडाध्यक्षका प्रत्यासीसमेत रहेका गोहिवारलाई विना कसुर प्रहरीले नियन्त्रणमा लिन खोज्दा स्थानीयले प्रतिकार गरी रोकेका छन् । गोहिवार भन्छन्, ‘म खेतमा काम गरिरहेका थिए, तीनजना घुमुवा प्रहरी मेरो घरमा आएर नाना थरीको क्रियाकलाप गर्न थाले, केही छिनमा म खेतबाट घर आए, घुमुवा प्रहरीले चारैतीरबाट तनाव दिन थाले, केही छिनमा प्रहरीको भ्यान आयो, मलाई जबजस्ती भ्यानमा कोच्न थाले, जबकी त्यसमा मेरो कुनै संलग्ता नै छैन । स्थानीयले निर्दोषलाई साथ दिए, किन के कारणले निर्दोष मान्छेलाई लैजान खोजेको हो भन्दै प्रहरीलाई मलाई समातेर लैजान दिएन ।’

गोहिवार विभिन्न समयमा जनप्रतिनिधिको मनोमानीविरुद्ध बोलिरहन्छन् । सोही प्रतिशोधका कारण आफूलाई प्रहरीबाट अनावश्यक तनाव दिन लगाइएको उनले सुनाए । उनले प्रहरीबाट तनाव खेपेको यो पहिलो पटक भने होइन । उनलाई प्रहरीबाट पटकपटक अनावश्यक तनाव दिइने काम हुँदै आएको छ ।

जनप्रतिनिधिको मनोमानीविरुद्ध बोलेकै कारण राजनीतिक प्रतिशोधको भावनाले प्रत्यासी वडाध्यक्ष गोहिवारलाई पटकपटक मानसिक तनाव दिने कार्य हुँदै आएको स्थानीयहरु बताउँछन् ।

वडा नम्बर ३ मा नेकपाका वडाध्यक्ष छन् । गोहिवारको टोलमा भने अधिकांश उनी निकट नै छन् । प्रतिपक्षी बढी भएको सो बस्तीमा प्रहरीको आतंकले हैरान बनेको स्थानीयवासीको गुनासो छ ।