कृषि टिभीलाई कारवाहीको माग गर्दै आज फेसबुक प्रोफाइल कालो

न्यूज ब्यूरो, जनकपुरधाम । डा. सिके राउत नेतृत्वको जनमत पार्टी निकट जनमत विद्यार्थी संघका युवाहरुले आज कृषि टिभीको विरोधमा फेसबुक प्रोफाइल कालो बनाएका छन् ।

कृषि टिभीले मधेशी समुदायलाई अपमानित गरेको भन्दै कारवाहीको माग गर्दै विरोधका कार्यक्रम अन्तर्गत शुक्रबार सबैले आफ्नो प्रोफाइलमा कालो तस्वीर राखेका छन् ।

संघले बिहीबार पहिलो दिन कार्टुन बनाएर विरोध गरेको थियो । संघको आह्वानमा आज फेसबुकको प्रोफाइलमा कालो तस्वीर राखिएको हो ।

विरोधका कार्यक्रम अन्तर्गत शनिबार कालो अक्षरमा प्रेस काउन्सिल लेखेरमा फेसबुकमा पोष्ट गर्ने संघले जनाएको छ । यस्तै, आइतबार चौथो दिन इमेलमार्फत प्रेस काउन्सिलमा ध्यानाकर्षणपत्र बुझाउने र पाँचौं दिन सादा पानामा प्रेस काउन्सिल लेखेर घरमै बसी जलाउने कार्यक्रम संघको छ ।

जनमत विद्यार्थी संघका केन्द्रीय अध्यक्ष पोषणकुमार यादवले गत बुधबार विज्ञप्ति जारी गरी कृषि टेलिभिजनमा प्रसारण हुने कोरोना गफगाफ कार्यक्रमका प्रस्तोता र टेलिभिजनलाई कारबाही गर्न माग गरेका थिए । उनले मधेश (मधेशी, थारु, जनजाति, मुस्लिम आदि) माथि गरिएको व्यङ्ग अक्षम्य र असहनीय रहेको भन्दै कारबाहीका लागि प्रेस काउन्सिल नेपालसँग माग गरेका थिए ।

पाँचौं दिनसम्म कारबाही नभए विरोधका थप कार्यक्रम सार्वजनिक गर्ने संघको चेतावनी छ ।