जनकपुरः खान परिवारको यसपाली इदको सबै खर्च गरिबलाई

न्यूज ब्यूरो, जनकपुरधाम । मुस्लिम धर्मावलम्बीहरुको महान पर्वको रुपमा मनाइने इद चलिरहेको छ ।

लकडाउनका कारण प्रभावित गरिबहरुलाई जनकपुरका एक परिवारले इद मनाउनको लागि गरिबहरुलाई राहत दिएको छ ।

जनकपुरको एकै परिवारले २०० गरिब परिवारलाई राहत दिने भएको छ । विहिबार इद सहित जुम्मा (शुक्रबार) लाई मध्यनजर गर्दै १०० परिवारलाई राहत दिएको हो ।

मुस्लिम धर्मावलम्बीहरुको उल्लासको पर्वमा नयाँ लुगाफाटा, मिष्ठान भोजन सहितमा मोटो खर्च गर्दै आएका साफी परिवारले त्यो खर्चलाई यसपाली गरिबमा बाँडेका छन् ।

निरन्तर लकडाउनका कारण प्रभावित भएका विपन्न मुस्लिम परिवारलाई १० किलो चामल र १ किलो सेबई बाँडिएको हो । विहिबार १०० जनालाई बाँडिएको जनाउँदै शुक्रबार थप १०० जनालाई बाँडने भएको छ ।

जनकपुरका जानी खानले यसपाली इदको सबै खर्च गरिबलाई दिने मनसाय बनाएको बताइएको छ ।

खानका बुवा इसुफ़ साफी, जेठ दाई इलियाश साफी, डाक्टर दाई सज्जाद साफी, माइलो भाई रियाज साफी र कांछो भाई जिलानी साफीको सहयोगले गरिबलाई इदको लागि सहयोग गर्ने मनसाय बनाएको बताइएको छ ।

कोरोनाको महामारीलाई मध्नजर गर्दै पसलमा सपिँग (किनमेल) को लागि जानुपर्ने बाध्यतालाई हटाउन घरमै बसी इद उल फित्र बनाउन १०० परिवारलाई राहत दिएको हो ।