क्वारेन्टाइनभित्रै एक युवक ढले, रिपोर्ट आउन बाँकी !

न्यूज ब्यूरो, नेपालगँज । प्रदेश नं. ५ को बाँकेमा एक व्यक्तिको क्वारेन्टाइनभित्रै ढलेको छ । यद्यपी उनको मृत्यू भएको वा नभएको भनेर यकिन भएको छैन ।

बाँकेको नरैनापुर गाउँपालिका वडा नम्बर ५ दिपेन्द्र प्राथमिक विद्यालय भोजभगवानपुर क्वारेन्टाइनमा रहेका एक व्यक्तिको ढलेको जिल्ला प्रहरी कार्यालय बाँकेले जनाएको छ ।

आइतबार (आज) बिहान उक्त क्वारेन्टाइनमा बसेका नरैनापुर गाउँपालिका वडा नम्बर ५, नयाँबस्तीका २५ बर्षिय एक युवकको मृत्यू भएको भनेर विभिन्न सँचारमाध्यमहरुमा समाचार आएपछि बाँकेका प्रहरी प्रवक्ता शिव बहादुर सिँहले मृत्यू नै भएको भनेर यकिन नभएको बताए ।

ढलेका युवक गत बैशाख ३० गते भारतको मुम्बईबाट नेपाल आई उक्त क्वारेन्टाइनमा बसेको सिँहले न्यूज ब्युरोसँग भने ।

शनिबार मात्रै उक्त क्वारेन्टाइनबाट स्वास्थ्य कार्यालय बाँकेको टोलीले उनी सहित ३९ जनाको स्वाब संकलन गरि पिसिआर जाँचका लागि भेरी अस्पताल ल्याएको थियो ।

अहिले उनि सहित नरैनापुरबाट शनिबार संकलन गरि ल्याइएका स्वाबको परिक्षण गर्ने काम भेरी अस्पतालमा भइरहेको जनाइएको छ । क्वारेन्टाइन व्यवस्थापनका ईन्चार्जले भने उनको मृत्यू भईसकेको प्रतिक्रिया दिएका छन् ।

प्रवक्ता सिँहका अनुसार क्वारेन्टाइनभित्रै लडेको र अहिलेसम्म उठेका छैनन । उनको मृत्यू भएको वा नभएको बारे स्वास्थ्यकर्मीको टोली पुगिसकेको छ भने युवक लडेको ठाउँको परैदेखि हेरिदै छ ।

उनको स्वाब परीक्षणको रिपोर्ट भने आउन बाँकी रहेको जनाइएको छ ।