दिल्लीबाट जनकपुर आए एक 'जमाती'

न्यूज ब्यूरो, जनकपुरधाम । नेपाल–भारतको सीमामा सुरक्षा थपिँदै जाँदा पनि भारतको दिल्लीबाट एक जमाती जनकपुर आएका छन् ।

बोर्डरमा प्रहरीको उच्च निगरानी रहेपनि गत मँगलबार राती नै दिल्लीबाट लुकिछिपी आएको हो । उनी धनुषाको क्षीरेश्वरनाथ नगरपालिकाका हुन् ।

धनुषाको क्षीरेश्वरनाथ नगरपालिका वडा नं. ६ सखुवा टोल बस्ने उनी आफू दिल्लीमा भएको मुस्लिमहरुको तबलिगी जमातमा भाग लिएर आएको स्वीकारेका छन् । बोर्डरमा टाईट सुरक्षा भएपनि कसरी आए भन्नेबारे स्थानीय जनप्रतिनीधि पनि अलमलमा छन् ।

क्षीरेश्वरनाथ नगरपालिकाका मेयर योगेन्द्र पँजियारका अनुसार गत मँलबार नै उनी भारतको दिल्लीबाट आएको तथा आफू जमातमा समेत भाग लिएको स्वीकारेको बताएका छन् ।

मेयर पँजियारका अनुसार, यसको लागि प्रशासनलाई हिजै (बुधबार) देखि नै टेस्टको लागि पहल गरिएपनि कुनै चासो नलिएको आरोप लगाएका छन् ।

यता, जिल्ला प्रशासन कार्यालयले उनको पहिचान भएको तथा अहिले क्षीरेश्वनाथ नगरपालिकाको क्वारेन्टाइनमा रहेको भन्दै तुरुन्त टेष्टको लागि जनकपुर ल्याउने तयारी भईरहेको जनाएको छ ।

सहायक प्रमुख जिल्ला अधिकारी शरद पोखरेलले प्रशासन मात्र समन्वय गर्ने तथा स्वास्थ्यले उनलाई ल्याउने तथा परीक्षणको तयारी गर्ने बताए ।

बोर्डरमा कडा सुरक्षा भनिएपनि राती लाईन कटेको बेलामा भारतबाट नेपाल छिर्ने गरेको देखिएको छ ।