सिरहामा ट्रकको ठक्करबाट महिलाको घटनास्थलमै मृत्यु

न्यूज ब्यूरो, सिरहा । सिरहामा ट्रकको ठक्करबाट एक महिलाको ज्यान गएको छ ।

पूर्व पश्चिम राजमार्ग अन्तर्गत गोलबजार नगरपालिका–४ स्थित मैनाबत्ति पुलमा ट्रकले ठक्कर दिँदा धनगढीमाई नगरपालिका–१० की ३५ वर्षीया विन्दा साफीको मृत्यु भएको हो । पश्चिमबाट पूर्वतर्फ आइरहेको ना. ५ ख. ३३०९ नम्बरको ट्रकले ठक्कर दिएको हो ।

साइकलमा सबार साफी विष्णुपुर गाउँपालिकामा आफन्तकोमा गइरहेका बेला मैनाबत्ति पुलको बीचमा एकैपटक दुईवटा ट्रक आउँदा डराएर साइकल अनियन्त्रित भएपछि साइकल ट्रकमा ठोक्किएको प्रहरीले जनाएको छ ।

ट्रकले ठक्कर दिएपछि उनको घटनास्थलमै मृत्यु भएको बताइएको छ । ट्रक र चालकलाई नियन्त्रणमा लिएको सिरहा प्रहरीले जनाएको छ ।