कोरोना संक्रमण जोखिमले प्रदेश २ का आठै जिल्ला 'रेडजोन'मा

न्यूज ब्यूरो, जनकपुरधाम । सरकारले कोरोना संक्रमण फैलन सक्ने खतराका दृष्टिले प्रदेश २ का आठै जिल्लालाई अति जोखिमपूर्ण (रेडजोन) क्षेत्रको सूचीमा राखी लकडाउनलाई अझ बढी प्रभावकारी रुपमा अगाडि बढाएको छ ।

कोरोना संक्रमणको उच्च जोखिममा रहेको यो प्रदेशको आठ वटै जिल्लामा लकडाउनलाई प्रभावकारीरुपमा लागू गरी सीमा सतर्कता बढाइएको छ । भारतीय सीमासँग जोडिएको प्रदेश २ का आठ जिल्लाको लम्बाइ ४२८ किलोमिटर छ ।

सो क्षेत्रमा ३२९ वटा चेक प्वाइन्ट खडा गरी सीमा क्षेत्रको आउजाउमा व्यापक कडाइ गरिएको छ । खुला सीमाका कारण भारतबाट लुकीछिपी नेपाल प्रवेश गर्ने क्रम बढेपछि प्रदेश २ प्रहरी कार्यालयले सीमा नाकामा चेक प्वाइन्ट खडा गरी निगरानी बढाएको हो ।

लकडाउनलाई सफल पार्न प्रहरीले कडाइ गरेपछि सामाजिक दूरी कायम गर्नेमा सुधार हुँदै आएको प्रदेश २ प्रहरी कार्यालयले जनाएको छ ।