सिरहामा मिसावट गरी चियापत्ति बेच्ने पक्राउ, कारवाहीमा ढिलासुस्ती

न्यूज ब्यूरो, सिरहा । जनगुनासो भएपछि सिरहा नगरपालिका–१ मा रहेको रवि जेनरल स्टोर्स (न्यू पवन इम्पोरियम) बाट प्रहरी टोलीले छापा मारेर विभिन्न ब्राण्डका मिसावट गरिएको चियापत्ति बरामद गरेका छन् ।

मिसावट गरिएको चियापत्तिसँगै सिरहा नगरपालिका–१ मा रहेको रवि जेनरल स्टोर्सका संचालक प्रमोद जैनलाई इन्सपेक्टर रोहित फुयालको कमाण्डमा गएको प्रहरी टोलीले पक्राउ गरेको जिल्ला प्रहरी कार्यालय सिरहाका डिएसपी विनोद घिमिरेले बताए ।

‘खुल्ला गरिएको चियापत्तिको नमूना लिई परिक्षणका लागि पठाएका छौं,’डिएसपी घिमिरेले भने,‘पक्राउ गरिएका व्यक्ति र बरामद भएको चियापत्ति उद्योग बाणिज्य संघका अध्यक्ष प्रमोद पौद्दारको जिम्मा लगाएका छौं ।’ गुनासो मात्र आएको र लिखित जाहेरी नआएको हुँदा तत्काल दैनिक उपस्थित हुने शर्तमा व्यक्तिलाई छाडिएको उनले जनाए । परिक्षणको परिणाम आएपछि थप कारवाही प्रक्रिया अगाडि बढाउने उनको भनाई छ ।

सोक्तिम कम्पनीको चियापत्तिसँगै विभिन्न ब्राण्डका चियापत्तिको प्याकेट फुटाई मिसावट गरी खुल्ला चियापत्ति भन्दै बिक्रि गर्दै आएका थिए । रवि जेनरल स्टोर्सका संचालक जैनले दैनिक रुपमा उपभोग हुने विभिन्न खाध्यबस्तुको डिलर लिई थोक बिक्रेताको रुपमा चिनिएका छन् ।

श्रोतका अनुसार सिरहा बजारको विभिन्न बेग्ला बेग्लै ठाउँमा गोदाम राखेर यस्ता मिसावट गर्नुका साथै मौका मिलाएर म्याद गुज्रेका सरसमान बिक्रि समेत गर्ने गरेका छन् । खोजविन गरियो भने मिसावट गरिएको यस्ता कैऔं सरसमान फेला पर्न सक्ने श्रोतको दाबी छ ।

यसरी पुग्यो प्रहरी टोली

एक उपभोक्ताले न्यू पवन इम्पोरियममा चियापत्ति किन्यो । अन्य दिन भन्दा त्यो चियापत्ति प्रयोग गरी बनाएको चियाको स्वाद फरक लाग्यो । खोज्दै जाँदा त्यो पसलको सडकको पश्चिमपट्टि १ हजार भन्दा बढि चियापत्तिको खाली प्याकेट फेला प¥यो ।

त्यसरी शंकाकै आधारमा प्रहरीलाई खवर गर्दा शनिवार करिब चार बजे ५० किलो भन्दा बढि मिसावट गरिएको चियापत्ति र खाली प्याकेट सहित रवि जेनरल स्टोर्सका संचालक जैनलाई पक्राउ गरियो तर त्यसको विस्तृत जानकारी भने सार्वजनिक गरिन् । प्रहरी टोली फर्केको केही घण्टा पछि संचाकको निर्दैशनमा चार दिन अघि देखि फालिएको खाली प्याकेट छनभरमै जलाएर नष्ट पारे ।

प्याकेट फुटाउनुको कारण

गुणस्तरहिन चियापत्ति मिसाउन सोक्तिम कम्पनीको चियापत्तिको प्याकेट फुटाएको बताइएको छ । प्याकेट फुटाएर गलत गरेको संचालकले पनि स्वीकारेका छन् । सोक्तिम कम्पनीले २५० ग्राम देखि २ किलो र ४ किलोको प्याकेट बजारमा ल्याएको पाइन्छ । उपभोक्तालाई सहज हुने गरी कम्पनी प्याकेट बनाएको भएपनि त्यसलाई फुटाउनु भने गलत नियत रहेको प्रष्ट हुन्छ ।