सिरहामा आगलागी हुँदा लाखौंको क्षति, दुई घाइते

न्यूज ब्यूरो, सिरहा । सिरहामा आगलागी हुँदा लाखौंको क्षति भएको छ ।

लहान नगरपालिका–२२ स्थित स्थानीय मोहन यादवको घरमा आगलागी भएको हो । राति २ बजेतिर भएको आगलागीमा परेर दुई जना घाइते समेत भएका छन् ।

घाइते एकजना पुरुष र एक महिलाको लहानस्थित एक अस्पतालमा उपचार भइरहेको छ । उनीहरुको स्वास्थ्य अवस्था सामान्य रहेको ईलाका प्रहरी कार्यालय लहानका प्रहरी नायव उपरीक्षक (डिएसपी) सरत थापा क्षेत्रीले जानकारी दिए ।

घरका सबैजना सदस्य सुतिरहेको समयमा अचानक भएको आगलागीमा घरमा रहेका गोरु, बाख्रा, भैँसी सामान्य घाइते भएका छन् । घरमा रहेको अन्नपात, लत्ताकपडा लगायतका सामाग्री भने जलेर पूर्ण रुपमा नष्ट भएको छ ।

बिजुली शर्ट भएर वा चुलोबाट आगो सल्केर आगलागी भएको देखिएको बताइएको छ । डिएसपी क्षेत्रीले न्यूज ब्यूरोसँग भने, ‘बिजुली वा चुलोबाट आगलागी भएको देखिएको छ, हामी थप अनुसन्धान गर्दैछौं ।’