सांसद अपहरण प्रकरण : सरकारी वकिल कार्यालयले पनि लिएन जाहेरी

न्यूज ब्यूरो, काठमाडौं । सरकारी वकिलको कार्यालय, काठमाडौंले पनि सत्तारुढ नेपाल कम्युनिस्ट पार्टी (नेकपा) का सांसदद्वय महेश बस्नेत र कृष्णकुमार श्रेष्ठ (किसान) तथा नेपाल प्रहरीका पूर्व महानिरीक्षक सर्वेन्द्र खनालविरुद्ध अपहरणको जाहेरी दर्ता गर्न अस्वीकार गरेको छ ।

महानगरीय प्रहरी परिसर, काठमाडौंले जाहेरी दर्ता गर्न अस्वीकार गरेपछि जसपाका नेताहरु सरकारी वकिलको कार्यालय पुगेका थिए । तर, दुई घण्टा लामो छलफलमा पनि सरकारी वकिलको कार्यालयले जाहेरी लिन अस्वीकार गरेको हो ।

जहेरी दर्ता नभएपछि जसपाका नेताहरु र सरकारी वकिलको कार्यालयका कर्मचारीबीच भनाभनसमेत भएको छ ।

बस्नेत, श्रेष्ठ र खनालले तत्कालीन समाजवादी पार्टीका सांसद डा. सुरेन्द्र यादवलाई १० वैशाखमा महोत्तरीबाट काठमाडौं ल्याएका थिए । डा. यादवले आफूलाई अपहरणको शैलीमा काठमाडौंमा ल्याएको बताएका छन् ।

समाजवादी पार्टीका नेताहरूले प्रधानमन्त्रीकै निर्देशनमा आफ्ना सांसदलाई अपहरण गरिएको दाबी गरेका छन् ।