सर्लाहीमा झगडामा एक महिलाको मृत्यु, पाँच पक्राउ

न्यूज ब्यूरो, सर्लाही । सर्लाहीमा दुई परिवारबीचको झगडामा एक महिलाको ज्यान गएको छ ।

हरिपूर्वा नगरपालिका–८ मा स्थानीय खोददी खातुन र सैदुन खातुनको परिवारबीचको झडामा ३५ वर्षकी सैदुन खातुनको मृत्यु भएको हो ।

खोददी खातुनका छोराछोरी सैदुन खातुनको प्याजबारीमा गएको विषयमा झगडा सुरु भएको थियो । सुरुमा छोराछोरीबीच भएको झगडामा पनि अभिभावकहरु पनि मिसिएका सर्लाही प्रहरीले जनाएको छ ।

झगडाका क्रममा गम्भीर घाइते भएकी सैदुनलाई उपचारका लागि जनकपुरधामस्थित प्रादेशिक अस्पताल लैजाने क्रममा मृत्यु भएको प्रहरी प्रवक्ता तथा डिएसपी मदन कुँवरले जानकारी दिए ।

यता, कुटपिटमा संलग्न पाँच जनालाई प्रहरीले पक्राउ पनि गरेको छ । घटना सम्बन्धमा अनुसन्धान थालिएको प्रहरीले बताएको छ ।