मध्यरातको जुट र फुट : कसको पार्टी होला पहिले दर्ता ?

न्यूज ब्यूरो, काठमाडौं । समाजवादी पार्टीकी उपाध्यक्ष एवम् सांसद रेणु यादवको नेतृत्व सो पार्टी फुटाएर नयाँ पार्टी बनाउन सात सांसदले निर्णय गरेका छन् ।

यादवसहित सांसद महम्मद इस्तियाक राई, प्रदिप यादव, उमाशंकर अरगरीया, कलुदेवी विश्वकर्मा, सुरेन्द्र यादव र रेणुका गुरुङले सो निर्णय गरेका हुन् । सो समूहका एक सांसदका अनुसार, अलग पार्टी गठन गर्ने तयारीका लागि बुधबार साँझ बिद्रोही सांसदहरू रेणु यादवको शान्तिनगरस्थित निवासमा भेला भएर यस्तो निर्णय गरेका हुन् ।

समाजवादी पार्टी स्रोतका अनुसार आज (बिहीबार) नै नयाँ पार्टी गठन गर्ने तयारी असन्तुष्ट पक्षको छ । पार्टी विभाजनकै लागि भनेर महोत्तरीमा रहेका सांसद सुरेन्द्र यादव सरकारी सहयोगमा काठमाडौं आएको ती सांसदले बताए ।

सांसद यादव जनकपुरबाट एक्कासी गायव भएपछि समाजवादी पार्टीले आफ्नो सांसदलाई सरकारले अपहरण गराएको आरोप लगाएको थियो । तर, उनलाई अपहरण गरेको नभई पार्टी विभाजनमा सहभागी हुन सरकारको निर्देशनमा काठमाडौं पुर्याइएको बुझिएको छ ।

समाजवादीका प्रतिनिधिसभामा जम्मा १७ जना सांसद छन् । सरकारले ल्याएको नयाँ अध्यादेशअनुसार समाजवादी पार्टी फुटाएर नयाँ पार्टी गठन गर्न सात जना सांसद भए पुग्छ ।

समाजवादीका सात सांसदले पार्टी फुटाउने निर्णय गरेपछि हतारहतार मध्यरातमा समाजवादी पार्टी र राजपाले एकीकरणको घोषणा गरेका छन् । दुवै पार्टी एक भएपछि सात सांसदले मात्र एकीकृत पार्टीको संसदीय दलको ४० प्रतिशत पुग्ने छैन ।

तर, त्यसका लागि एकीकृत पार्टी निर्वाचन आयोगमा दर्ता हुनुपर्नेछ । जुन पार्टी पहिले दर्ता भयो त्यसैले बाजी मार्छ । नयाँ एकीकृत पार्टी निर्वाचन आयोगमा पहिले दर्ता भयो भने समाजवादी फुटाएर सात सांसदले अर्को नयाँ पार्टी दर्ता गर्न पाउने छैनन् ।

तर, सत्ताको साथ रेणु यादव नेतृत्वका सांसदलाई रहने हुनाले उनीहरूकै पार्टी निर्वाचन आयोगमा दर्ता हुनसक्ने विश्लेषकहरूको अनुमान छ ।