मिर्चैयामा लकडाउन प्रभावितलाई हेल्प मधेशीको राहत

न्यूज ब्यूरो, सिरहा । लकडाउनबाट प्रभावित मिर्चैया नगरपालिका ८ का गरिब तथा विपन्नलाई खाद्यान्न सहयोग गरिएको छ ।

सामाजिक संस्था हेल्प मधेशीले मिर्चैया ८ का दुई बस्ती भगवतपुरमा ३ र मझौवामा ५ गरि ८ घरपरिवारलाई खाद्यान्न सहयोग गरेको हो । लकडाउनका कारण रोजिरोटी खोसिएपछि उनीहरुको चुलो बल्न पनि समस्या भएको थियो ।

उनीहरु समस्यामा परेको जानकारी पाएपछि मिर्चैया ७ निवासी तथा हाल कत्तारमा रहेका हेल्प मधेशीका रामप्रकाश यादवले उनीहरुको लागि संस्थामा पहल गरेका थिए । उनको पहलपछि हेल्प मधेशी कत्तारका जनकपुर निवासी कामेश्वर यादव, मिर्चैया ७ कै विशेश्वर महरा, सन्त कुमार मुखिया र उनी स्वयंको आर्थिक सहयोगमा लकडाउन प्रभावितले राहत पाएका हुन् ।

हेल्प मधेशीले उपलब्ध गराएको राहत सामाग्री हेल्प मधेशीकै उपेन्द्र यादव, स्थानीय जनसेवा युवा क्लबका संस्थापक तथा पूर्वअध्यक्ष सुरेन्द्र यादव, क्लबका अध्यक्ष सुभाष यादव तथा स्थानीय रामप्रकाश पासवानले पीडितको घरघरमै पुर्याइदिएका छन् ।

प्रभावितहरुलाई राहत स्वरुप १२ किलो चामल, १ किलो दाल, १ किलो नुन, १ लिटर खाने तेल, २ किलो आलु, १ किलो प्याज, ५०० ग्राम सोयाविन, २ पिस साबुन लगायतका सामाग्री प्रदान गरिएको हो । राहत सामाग्री पाएपछि उनीहरु खुशी हुँदै दातृ संस्थालाई धन्यवाद दिए ।