नगरपालिकाले पैदल यात्रीलाई खाना खुवाउँदै, गाडी चढाउँदै

न्यूज ब्यूरो, धनुषा । धनुषाको मिथिला नगरपालिकाले विभिन्न स्थानबाट पैदल यात्रा गर्दै धनुषासम्म आइपुगेका विभिन्न जिल्लाका पैदल यात्रुलाई उद्दार कार्य गरिरहेको छ ।

नगरपालिकाले उनीहरुलाई खाना खुवाई गाडी चढाएर जिल्लाको सीमाक्षेत्र कमला पुलसम्म पुर्याउने गरेको हो । शनिबारदेखि नै नगरपालिकाले यो कार्य सुरु गरेको छ ।

आजमात्रै नगरपालिकाले झण्डै डेढसय जति यात्रुको उद्दार गरेको छ । पैदल यात्रीहरुलाई खाना खुवाएर सीमासम्म छोड्ने काम भइरहेको मिथिला नगरपालिकाको मेयर हरिनारायण महतोले जानकारी दिए ।

मिथिला नगरपालिकामा कोरोना भाइरस (कोभिड–१९) को संक्रमण फैलिन नदिन सचेतना, सजगता र स्वास्थ्य परीक्षणका काम भइरहेका छन् भने, संगसंगै राहत वितरणका काम पनि चलिरहेका छन् ।

कोरोना संक्रमण फैलिन नदिन अपनाइएका विभिन्न सावधानीका कार्यहरुलाई नगरप्रमुख महतो र उपप्रमुख तारा लामाले निरन्तर रुपमा अनगुमन गरिरहेका छन् । मेयर महतोले लकडाउनमा देशको कुनै कुनामा समस्यामा परेका आफ्नो नगरका नागरिकको उद्दार गर्न सबैथोक तयारी गरेको बताए ।