जनकपुरः नोट फाल्ने २ महिलामध्ये एकमा मात्र आरडीटि पोजिटिभ, स्वाब परीक्षण हुँदै

न्यूज ब्यूरो, जनकपुरधाम । शुक्रबार दिउँसो जनकपुरको महावीर चोकमा १०/१० का नोटहरु फालेर त्रास फैलाएकी महिलाहरुलाई आज पक्राउ गरी चेक गर्दा एक जनामा आरडिटी पोजिटिभ देखिएको छ ।

पक्राउ परेकी दुई जना महिलामध्ये एक जनामा आरडिटी पोजिटिभ देखिएको कारोना सम्बन्धी प्रदेश नं. २ का फोकल पर्सन विजय झाले जानकारी दिनुभयो ।

न्यूज ब्यूरोसँग संक्षिप्त कुराकानी गर्दै झाले अस्पतालले दिएको जानकारीलाई उदृत गर्दै एक महिलामा मात्र आरडिटी पोजिटिभ देखिएको बताउनुभएको छ । उहाँले दुवै जनामा पोजिटिभ नेदेखिएको बताउनुभएको छ ।

आज दिउँसो ती दुवै महिलालाई जनकपुरधाम उपमहानगरपालिका वडा नं. ७ स्थित रहेको एक मदरसाबाट पक्राउ गरी परीक्षणको लागि प्रादेशिक अस्पताल जनकपुरमा लगिएको थियो ।

जिल्ला प्रहरी कार्यालय धनुषाका प्रहरी प्रवक्ता रामेश्वर कार्कीका अनुसार उनीहरुलाई दिउँसो कडा खोजतलास पछि पक्राउ गरिएको बताउनुभयो । पक्राउ गरेलगत्तै उनीहरुलाई परीक्षणको लागि प्रादेशिक अस्पताल जनकपुरमा लगिएको थियो ।

त्यहाँ ल्याब टेस्टपछि जानकारी गराउँदै फोकल पर्सन (सम्पर्क व्यक्ति) विजय झाले एक जनामा पोजिटिभ आएको बताउनुभयो । उनीहरुको अब पिसिआर टेस्ट गर्नको लागि स्बाव सँकलन गरी जाँच गरिने बताउनुभयो ।

दुवै महिला नातामा भाउजु र नन्द हुन्। आज दिउँसो जानकी नगरस्थित मदरसाको पछाडिबाट उनीहरुलाई पक्राउ गरिएको हो ।

घटनापछि सिसिटिभी फुटेजको आधारमा अनुसन्धान सुरु गरिएको थियो। सिसिटिभी फुटेजमा मुख छोपेकी दुईजना महिलाहरु देखिएपछि प्रहरीले उनीहरुको खोजी तीव्र पारेको थियो।

प्रहरीले नोटबाट कोरोना भाइरसको संक्रमण फैलिन सक्ने भन्दै शुक्रबार साझ घटनास्थललाई सेनिटाइज समेत गरेको थियो ।

महिलाले १० रुपैयाँको १५ वटा नोट बाटोमा छरेर भागेकी थिइन । प्रहरीले उनीहरुको मास्क भएको तस्विर लिएर हुलिया मात्रको तस्विर राखेर कसैले देखेमा खवर गर्नको लागि अनुरोध गरेको थियो ।