जनकपुरमा पैसा फालेर फरार दुबै महिला पक्राउ

न्यूज ब्यूरो, जनकपुरधाम । जनकपुरको सडकमा पैसा फालेर त्रास फैलाएका दुई महिला पक्राउ परेका छन् ।

पक्राउ पर्नेमा जनकपुरधाम उपमहानगरपालिका दुबै महिला नन्द र भाउजू हुन् ।

उनीहरुलाई जनकपुरधाम ७ जानकी नगरबाट प्रहरीले आज (शनिबार) पक्राउ गरेको हो । दुबै महिलले शुक्रबार दिउँसो साढे १२ बजेको समयमा जनकपुरको महावीर चौकको बाटोमा १० रुपैयाँको एकदर्जन बढी नोट फालेर भागेकी थिइन् ।

कोरोना फैलाउन भन्दै ती दुबै महिलाले पैसामा थुक लगाएर बाटोमा फालेको हुन सक्ने आशंका गरिएको थियो । प्रहरीले पैसा फालेर त्रास फैलाउने दुबै महिलाको तस्बीर सीसीटभीबाट पत्ता लगाइ पक्राउ गर्न सार्वजनिक गरेको थियो ।

प्रहरीले हिजैदेखि उनीहरुको खोजी तीव्र पारेको थियो । आज पक्राउ परेका उनीहरुको प्रादेशिक अस्पतालमा स्वास्थ्य जाँचका साथै कोरोना परिक्षणको पक्रिया सुरु गरिएको छ ।

यसमाथि थप अनुसन्धान भइरहेको धनुषाका प्रहरी प्रवक्ता तथा डिएसपी रामेश्वर कार्कीले जानकारी दिए ।