'आज ८ जनामा कोरोनाको पुष्टि भएको छैन' : मन्त्रालय

न्यूज ब्यूरो, विराटनगर । विभिन्न सञ्चारमाध्यमहरुमा प्रदेश १ मा आजै ८ जनामा कोरोना पोजिटिभ पुष्टि भएको समाचार अपुष्ट रहेको अस्पतालले जनाएको छ ।

प्रदेश नं. १ का समाजिक विकास मन्त्रालयका सूचना अधिकारी बलराम पराजुलीले कोशी अस्पताललाई उदृत गर्दै ८ जनामा कोरोक्रिनाको पुष्टि अझै नभएको प्रतिया दिनुभएको छ ।

विभिन्न सँचार माध्यमहरुमा मस्जिदमा लुकेर बसेका १० जनामध्ये ८ जनामा कोरोना पुष्टि भएको समाचार प्रकाशन प्रकाशित गरिएको छ ।

प्रदेश नं. १ मा पर्ने उदयपुर जिल्लाको त्रियुगा नगरपालिका वडा नं. ३ स्थित रहेको भुल्के स्थितको मस्जिदमा लुकिछिपी बसेका १० जना भारतीय नागरिकको केही दिन अघि थ्रोट स्वाब परीक्षण गरिएको भन्दै १० मध्ये ८ जनामा कोरोनाको पुष्टि भएको भनेर समाचारहरु प्रकाशित गरिएको छ ।

सो सन्दर्भमा समाजिका विकास मन्त्रालयका सूचना अधिकारी पराजुलीले कोशी अस्पताललाई सोध्दा अहिले पुष्टि नभएको प्रतिक्रिया दिएको बताउनुभयो ।

उहाँले केन्द्र सरकारको स्वास्थ्य तथा जनसँख्या मन्त्रालयको दैनिक हुने मिडिया ब्रिफिँगमा समेत उदयपुर बारे केही नभनेको भन्दै मुख्यमन्त्री कार्यालयसँग सम्पर्क गर्न प्रयास गरिरहेको बताउनुभयो ।

उहाँले सँचारमाध्यमहरुले स्रोत भनेर समाचार लेखिएपनि कुन स्रोतको आधारमा लेखेको आफूलाई जानकारी नभएको प्रतिक्रिया दिनुभयो ।

यता, कोशी अस्पतालमै कार्यरत एक जना चिकित्सकले शंकास्पद १० जनाको स्वाब मात्र पठाएको तथा अहिलेसम्म पोजिटिभ नेगेटिभ केही पुष्टि नभएको बताउनुभएको छ ।

साँझ ५ः३० बजेसम्म नेपाल सरकारको स्वास्थ्य तथा जनसँख्या मन्त्रालयको कोभिड–१९ रिस्पोन्स सेक्सनमा समेत १६ जनाको पुष्टि मात्र देखाएको छ । ८ जना थप बारे कुनै अपडेट भने गरिएको देखिएनन् ।

उहाँले ती १० जनाको स्वाबको नतिजाबारे साँझसम्म भन्न सकिने बताउनुभयो । शुक्रबार (आज) सम्म सरकारी तथ्याँक अनुसार कोरोना सँक्रमणको सँख्या १६ जना रहेको छ ।