जनकपुरः राहतको लागि दुई पार्टीबीच झडप, गाउँपालिका अध्यक्ष थुनिए !

न्यूज ब्यूरो, जनकपुरधाम । प्रदेश नं. २ को धनुषा जिल्लाको एक गाउँपालिकाका अध्यक्षलाई कोठा भित्र थुनिएको छ ।

धनुषाको धनौजी गाउँपालिकाका अध्यक्ष ब्रदी सिँहलाई कोठाभित्र थुनिएको हो । राहतलाई लिएर भएको विवादमा दुई पक्षबीच झडप भएपछि अध्यक्षलाई कोठाभित्र थुनिएको हो ।

अहिले केही बेर अगाडी धनौजी गाउँपालिकाको कार्यालय भित्रै राहतलाई लिएर बनाएको सँयन्त्र तथा सर्वदलिय समितिबीच कुटाकुट भएको हो ।

राहत वितरणको लागि बनेको वितरण समितिले विभिन्न वडामा राहतको लागि भनेपनि गाउँपालिका प्रमुख बद्री सिँहले समय नदिएको भन्दै हात हालाहाल भएको बुझिएको छ ।

ग्राउण्ड जिरो अर्थात घटनास्थलमा पुगेका न्यूज ब्यूरोका सँवाददाता अभिनय मिश्रका अनुसार राहत वितरणमा असन्तुष्ट भएपछि झडप भएको हो ।

धनौजी गाउँपालिकाको वडा नं. २ मा राखिएको कार्यालयमा कोरोनाको महामारीमा पनि जमघट गरेर विवाद गरेको हो ।

तत्कालिन एमाले तथा वर्तमान नेकपाबाट विजयी भएका वडा नं. ३ का वडाध्यक्ष राम दुलार मण्डलले वितरण समितिको निर्णय उपर असन्तुष्टि जनाएपछि विवाद उग्र भएको थियो ।

झडप समान्य भएको बताइएको छ । सो झडपमा परी ३ जना घाईते समेत भएको छ । उनीहरुको अवस्था समान्य रहेको छ ।

स्थानीय विन्देश्वर पण्डित , राम नारायण राय लगायतका व्यक्तिहरु घाईते भएको हो । उनीहरुको पार्टीगत हिसाबले विवाद भएको बताईएको छ ।

गाउँपालिका अध्यक्षलाई सुरक्षाको दृष्टिकोणले कोठा भित्र थुनेर राखिएको बताइएको छ ।

नेकपा र काँग्रेसका गाउँले नेताहरुबीच झगडा भएको बताइएको छ । यसबारे जिल्ला प्रहरी कार्यालय धनुषाले जानकारी नआएको प्रतिक्रिया दिएको छ । यस बारे थप विवरण आउन बाँकी छ ।