राहत वितरणमा विभेद गरेको भन्दै वडाध्यक्ष उपर हातपात !

न्यूज ब्यूरो, सुनसरी । लकडाउनका बेला गरिब, विपन्न, मजदुरको लागि राहत वितरण गर्ने क्रममा एक वडाध्यक्ष उपर हातपात भएको छ ।

प्रदेश नं. १ को सुनसरी जिल्लाको इनरवा नगरपालिका वडा नं. ८ का वडाध्यक्ष रविन्द्र मण्डल उपर स्थानीयहरुले हातपात गरेको जनाईएको छ ।

जिल्ला प्रहरी कार्यालय सुनसरीका प्रहरी प्रवक्ता डिएसपी विनोद शर्माका अनुसार राहत वितरणको क्रममा समान्य हातपात भएको बताउनुभएको छ ।

न्यूज ब्यूरोसँग कुराकानी गर्दै डिएसपी शर्माले वडामा राहत वितरण गर्न गएको बेला समान्य हातपात भएको बताउँदै कुटपिटको घटना नभएको बताउनुभयो ।

केही सँचारमाध्यमहरुमा वडाध्यक्षलाई कुटपिट गरेको भनेर समाचारहरु प्रकाशित भएपछि प्रहरी प्रवक्ता शर्माले त्यस्तो केही नरहेको प्रतिक्रिया दिनुभएको छ ।

इनरुवा नगरपालिकाको वडा नं. ८ स्थित दलित वस्तीमा पुगेका वडाअध्यक्षलाई राहतमा विभेद गरेको भन्दै हातपात गरिएको बताइएको छ ।

लकडाउनबाट प्रभावितहरुले राहत वितरणमा भेदभाव गरेको भन्दै राहत खोसाखोसको क्रममा हातपात भएको बताइएको छ ।

सोही क्रममा नगरकी उपमेयर जमुना देवी गौत्तमले यस घटनाबारे आफूलाई थाहा भएको तथा यस सन्र्दर्भमा वडाध्यक्षसँग बुझन खोज्दा फोन नउठेको बताउनुभयो । उहाँले पनि समान्य हातपातको घटना भएको सुन्नमा आएको बताउनुभयो ।

नगरपालिकाका आइटी अफिसर निरज पोखरेलले राहत वितरणको क्रममा समान्य खोसाखोस मात्र भएको बताउनुभएको छ । उहाँले कुटपिट गरिएको घटनालाई निराधार बताउनुभएको छ ।

यता, वडाध्यक्ष रविन्द्र मण्डलले न्यूज ब्यूरोको जिज्ञासामा आफू राहत वितरणमा व्यस्त भएको प्रतिक्रिया दिनुभयो । उहाँले केही धनी मुखौटाहरुलाई राहत नदिँदा विवाद गरेको पनि बताउनुभयो ।

लकडाउनका कारण प्रभावित अति गरिब, विपन्न, मजदुरहरुलाई सरकारले राहतको व्यवस्था मिलाउन भनिएको छ ।

राहत वितरणको क्रममा सबै पार्टीका प्रतिनीधिहरुको रोहबरमा गठित समितिकै कारण पनि विभिन्न ठाउँमा राहत वितरणमा विवाद भएको देखिएको छ ।

उनीहरुले लक्षित वर्ग भन्दा पनि आ आफ्ना पार्टीका कार्यकर्ता, भोटरहरुलाई मात्र राहतको नाममा सिफारिस गरेको भन्दै विवाद हुँदै आएको छ ।