राहत कोषमा गाउँपालिका अध्यक्ष चौधरीको १ लाख

न्यूज ब्यूरो, जनकपुरधाम । प्रदेश नं. २ को महोत्तरीको पिपरा गाउँपालिकाका अध्यक्ष (प्रमुख) विक्रम चौधरीले कोरोना कोषमा १ लाख रुपैयाँ दिनुभएको छ ।

कोरोना भाइरस महामारी रोकथामका लागि पिपरा गाउँपालिकाले सार्वजनिक गरेको दैवी प्रकोप व्यवस्थापन कोषमा निजी स्तरबाट १ लाख रुपैयाँ दिनुभएको हो ।

विश्व¥यापी महामारीको रुपमा फैलिरहेको कोराना भाइरसको सम्भावित संक्रमण रोकथाम नियन्त्रण र उपचारमा सहजता एवम् आर्थिक मन्दीलाई मध्यनजर गर्दै उहाँले १ लाख रुपैयाँ जम्मा गर्नुभएको हो ।

गाउँपालिकाको विपद व्यवस्थापन समितिका अध्यक्ष अरुण ठाकुर मार्फत आफ्नो नीजि स्तरबाट उहाँले १ लाख रुपैयाँ हस्तान्तरण गर्दै दाताहरुलाई समेत सहयोगको लागि अपिल गर्नुभयो ।

उहाँले १ लाख रुपैयाँको चेक हस्तान्तरण गर्नुभएको गाउँपालिकाका प्रमुख प्रशासकीय अधिकृत राम किशोर महतोले बताउनुभयो ।

बैठकमा अध्यक्ष चौधरीले सरकारले घोषणा गरेको लकडाउनको कारण धेरै नै अवस्था नियन्त्रणमा रहेको भन्दै गाउँपालिकाको विभिन्न वडाहरुमा राहत वितरण कार्य जारी रहेको बताउनुभयो ।

विपद व्यवस्थापनको लागि प्रदेश २ का सरकारले गाउँपालिकालाई १० लाख रुपैयाँ प्रदान गरेको छ भने गाउँपालिकाले २५ लाख रुपैयाँको राहत कोष खडा गरेको अधिकृत महतोले बताउनुभयो ।

पिपरा गाउँपालिकाको लागि स्थानीय तह प्रकोप व्यवस्थापन कोषको खाता नम्बर ०६२००१०६२०००१५ मा सबै पक्ष, दातृ निकाय, दातृ सँस्था, समाजसेवी, दाता, जनप्रतिनीधि,तथा देश विदेशमा रहनुभएकाहरुलाई सहयोगको लागि अपिल गरेको हो ।