भारतबाट फर्किरहेका ९ जमाती बाराबाट पक्राउ

न्यूज ब्यूरो, वीरगञ्ज । भारतबाट जमातबाट फर्किरहेका ९ जनालाई बारा प्रहरीले नियन्त्रणमा लिएको छ ।

भारतबाट फर्किंदै गरेका उनीहरुलाई अस्थायी प्रहरी पोष्ट जितपुरको टोलीले दशगजा नजिकैबाट पक्राउ गरेको हो । उनीहरु भारतीय प्रहरीलाई समेत छलेर दशगजासम्म पुगेको बारा प्रहरीले जनाएको छ ।

पक्राउ पर्नेहरुमा सप्तरीको महादेवा गाउँपालिकाका दुई, कञ्चनरुप नगरपालिकाका तीन र कृष्णश्रवण गाउँपालिकाका तीनजना रहेको जिल्ला प्रहरी कार्यालय बाराका प्रवक्ता डीएसपी गौतम मिश्रले नेपाल समयलाई जानकारी दिए । नियन्त्रणमा लिइएका सबैजनालाई क्वारेन्टाइनमा पठाइएको उनले बताए ।

उनीहरुले आफूहरु दिल्लीको धार्मिक सभामा सहभागी नभएको तर, बिहारकै सीतामढी, पूर्वी चम्पारण जिल्लाका विभिन्न मस्जिदसम्म पुगेर फर्केको बताएका छन् ।

यसअघि भारतको दिल्लीमा कोरोना भाइरस फैलाउन सहयोग पुगेको भनिएको मुस्लिम धार्मिक सम्मेलनमा १९ जना नेपाली सहभागी भएका थिए । त्यहाँबाट फर्किएको आशंकामा यसअघि प्रहरीले बाराबाट ११ जनालाई नियन्त्रणमा लिएको थियो ।