लकडाउनमा कडाई : अब एउटा स्थानीय तहबाट अर्कोमा पनि जान नपाइने

न्यूज ब्यूरो, जनकपुरधाम । नेपालमा कोरोना भाइरसको संक्रमित बढ्दै गएपछि लकडाउनलाई सरकारले थप कडाई गर्ने भएको छ ।

मन्त्रीपरिषदको आज (शनिबार) सम्पन्न बैठकबाट लकडाउनलाई थप कडा पार्ने निर्णय गरिएको हो । अब एक स्थानीय तहबाट अर्को स्थानीय तहमा समेत जान नपाइने भएको छ ।

बैठकले अब एक प्रदेशबाट अर्को प्रदेश, एक जिल्लाबाट अर्को जिल्ला र एक स्थानीय तहबाट अर्कोमा जान नदिने निर्णय गरेको हो । कोरोना भाइरसको प्रकोप न्यूनीकरणका लागि सरकारले चैत ११ गतेदेखि लकडाउन सुरु गरेको थियो ।

पहिलो चरणअन्तर्गत चैत १८ गतेसम्म घोषणा गरिएको लकडाउन पुनः थप गरेर चैत २५ गते राति १२ बजेसम्मका लागि तोकिसकिएको छ । चैत २५ पछि लकडाउन के गर्ने भन्नेबारे भने सरकारले कुनै निर्णय गरेको छैन ।