दिल्लीबाट फर्किएका सिरहाका ८ जना क्वारेन्टाइनमा

न्यूज ब्यूरो, सिरहा । भारतको राजधानी दिल्लीबाट फर्किएका सिरहाका ८ जनालाई क्वारेन्टाइनमा राखिएको छ ।

प्रहरीले उनीहरुलाई नियन्त्रणमा लिएर क्वारेन्टाइनमा पठाएको हो । भारतमा कोरोना फैलाएको भनिएको दिल्लीमा आयोजना गरिएको धार्मिक कार्यक्रममा सहभागी भएर उनीहरु घर फर्किएका कारण क्वारेन्टाइनमा पठाइएको सिरहा प्रहरीले जनाएको छ ।

भारतबाट फर्किदा समेत स्वास्थ्य जाँच नगराई घरमै बसिरहेकाहरुको खोजी गर्ने क्रममा उनीहरुलाई गोलबजार नगरपालिका १० बलकावाबाट नियन्त्रणमा लिएर क्वारेन्टाइनमा पठाइएको हो । गत मंगलवार मध्यराती घर फर्किएका उनीहरु स्वास्थ्य जाँचै नगराई सिधैँ घर पुगेका थिए ।

हालसम्म गोलबजारमा २५ जना क्वारेन्टाइनमा रहेका छन् । भारतबाट आएका थप केही व्यक्तिको खोजी कार्य भइरहेको जनाइएको छ ।