लकडाउन : जनकपुरमा कालोबजारी गर्ने दुई पक्राउ

न्यूज ब्यूरो, जनकपुरधाम । जनकपुरमा आलु, प्याज र माछामा कालोबजारी गर्ने २ जनालाई प्रहरीले पक्राउ गरेको छ ।

कोरोना भाइरसका कारण गरिएको लकडाउनको मौका छोपी जनकपुरमा कालोबजारी गर्ने दुई जनालाई पक्राउ गरिएको धनुषा प्रहरीले जनाएको छ । पक्राउ पर्नेमा भारत विहार जिल्ला मधुवनी बस्ने ३१ वर्षीय संजिव सहनी र जनकपुरधाम उपमहानगरपालिका १६ कपिलेश्वर बस्ने ३२ वर्षीय सरोजकुमार साह छन् ।

मंगलबार जिल्ला प्रहरी कार्यालय धनुषाबाट बजार अनुगमनमा खटेको प्रहरी टोलीले उनीहरूलाई जनकपुरबाट पक्राउ गरेको जिल्ला प्रहरी कार्यालय धनुषाका प्रहरी प्रवक्ता तथा डिएसपी रामेश्वर कार्कीले जानकारी दिए । सहनीले जनकपुरधाम उपमहानगरपालिका ७ स्थित माछाबजारमा माछा प्रति केजी ५०० र साहले जनकपुरधाम १६ कपिलेश्वरमा आलु प्रति केजी ५५, प्याज प्रति केजी ६० मा बेचिरहेका थिए ।

पक्राउ परेका दुबैमाथि थप अनुसन्धान भइरहेको प्रहरीले जनाएको छ ।