लहानमा लकडाउनबाट प्रभावित गरिबलाई एकलाख बराबरको राहत

न्यूज ब्यूरो, सिरहा । विश्वभर महामारीको रुपमा फैलिएको कोरोना भाइरस (कोभिड १९) रोकथामका लागि सरकारले गरेको लकडाउनबाट प्रभावित लहानका सयौं घरपरिवारलाई राहत प्रदान गरिएको छ ।

लहान नगरपालिका ८ मा लकडाउनबाट प्रभावित अति विपन्न तथा गरिब परिवारलाई राहत वितरण गरिएको हो । स्थानीय युवाहरुको एक समूहले सो वडामा पर्ने विभिन्न बस्तीका झण्डै एकसय ५ घरपरिवारलाई खाद्यान्न सामाग्री वितरण गरेका हुन् ।

उनीहरुलाई राहत स्वरुप प्रति परिवार ५ किलो चावल, आधी किलो दाल, अढाई किलो आलू, एक किलो नून, ३०० ग्राम सोयाविन, ५०० ग्राम भुजा, १०० ग्राम दालमोट, २०० ग्राम खाने तेल, ५ चाउँचाउँ, २ बिस्कुट, खुर्सानी र जीरा धुलो १०० ग्राम, अदुवा लसुन १०० ग्राम, भन्टा २ किलोसहित एकएक पिस साबुन वितरण गरिएको छ ।

राहत वितरणको लागि स्थानीय युवा बिनोद यादव, निलेश यादव, विकाश राय, राजु मण्डल, मोहन सिंह लगायतकाले एक लाख जति रकम जुटाएर सामाग्री खरिद गरी वडाध्यक्ष विजय महतोको रोहवरमा विपन्न परिवारहरुलाई हस्तान्तरण गरेको हो । उनीहरुले राहत वितरणसँगै कोरोना महामारीबाट जोगिन सचेत रहन पनि आग्रह गरे ।

समाज विपत्तमा परेका बेला आफूहरुले सामाजिक उत्तरदायित्व बोध गर्दै सहयोग गरेको सहयोगी युवाहरुले बताए ।