प्रदेश २ सरकारले गरिबलाई खुवाउन स्थानीय तहलाई रुपैयाँ पठायो

न्यूज ब्यूरो, जनकपुरधाम । प्रदेश २ सरकारले विभिन्न निकायलाई ९ करोड ३४ लाख रुपैयाँ पठाएको छ ।

विश्व महामारीको रुपमा फैलिएको कोरोना भाइरस (कोभिड १९) रोकथाम तथा त्यसबाट प्रभावित गरिब, मजदुरलाई खाद्यान्न दिन प्रदेश सरकारले स्थानीय तहदेखि अस्पतालसम्मलाई सो रकम पठाएको हो । सामाजिक विकास मन्त्रालयमार्फत मातहतका निर्देशनालय, जनस्वास्थ्य प्रयोगशाला, स्वास्थ्य आपूर्ति व्यवस्थापन, प्रत्येक पालिका, जिल्ला अस्पताल, प्रादेशिक अस्पताल लगायतलाई रुपैयाँ पठाइएको छ ।

प्रदेश सरकारले गरिब तथा मजदुरलाई लकडाउनको अवधिमा खाना खुवाउनका लागि प्रत्येक पालिकालाई पाँच लाखको दरले रुपैयाँ पठाएको छ । यस्तै, प्रदेश स्वास्थ्य निर्देशनालयलाई ८ लाख, स्वास्थ्य आपूर्ति व्यवस्थापन केन्द्रलाई १५ लाख र जनस्वास्थ्य प्रयोगशालालाई ५ लाख रुपैयाँ दिइएको छ ।

त्यसैगरी, प्रादेशिक अस्पताल जनकपुरलाई १२ लाख रुपैयाँ, प्रदेश नम्बर २ को ८ वटै जिल्ला अस्पताललाई १०–१० लाख रुपैयाँको दरले पठाइएको छ ।