मनकारी रामेश्वर, जो साबुन बोकेर चहार्दैछन् बस्ती

न्यूज ब्यूरो, सिरहा । विश्वभर महामारीको रुपमा फैलिएको कोरोना भाइरस (कोभिड १९) को डरले यत्तिबेला नेपाल त्रसित छ ।

नेपालमा कोरोनाको संक्रमण फैलिन नदिन सरकारले उच्च सतर्कता अपनाएको छ । कोभिड १९ एकबाट अर्कामा सर्ने भएकाले समाजिक दुरी कायम गर्न सरकारले देश नै लकडाउन गरेको छ ।

कोरोना रोकथामका लागि केन्द्र सरकारले प्रदेश र स्थानीय तहलाई विशेष सक्रिय भएर लाग्न निर्देशन दिएको छ । यत्तिबेला तीनै तहका सरकार कोरोना महामारी रोक्न कम्मर कसेर लागेका पनि छन् ।

तर, कतिपय जनप्रतिनिधिहरु भने यस्तो अवस्थामा पनि जनताको लागि चिन्तित देखिएका छैनन् । जनप्रतिनिधिले गर्नुपर्ने काम समाजका मनकारी व्यक्तिहरुले गरिरहेका छन् ।

विषम परिस्थितिमा उनीहरु समाजको लागि हात अघि बढाएका छन् । यसका उदाहरण हुन्, सिरहाको मिर्चैया नगरपालिका ७ निवासी रामेश्वर यादव । उनले कोरोना संक्रमणबाट बच्न सरसफाईको लागि वडाभर आफ्नो व्यक्तिगत खर्चमा साबुन वितरण गरेका हुन् ।

करिब साढे ६ सय घरधुरी रहेको उक्त वडाको विभिन्न बस्तीमा रामेश्वरले झण्डै ४ सय परिवारलाई घरघरमै पुगेर साबुन दिए । शनिबार सबैलाई भ्याउन नसकेका कारण बाँकी रहेकालाई आज (आइतबार) वितरण गर्ने उनले बताए ।

बाँकी रहेका थप दुईअढाई सय साबुनको लागि उनी विदेशमा रहेका साथीसँग सहयोग मागेका छन् । बैदेशिक रोजगारीको शिलशिलामा कत्तारमा रहेका सोही गाउँका रामप्रकाश यादवले बाँकीको लागि आर्थिक सहयोग गर्ने बाचा गरेको उनले जानकारी दिए ।

रामेश्वरले साबुन वितरण मात्रै होइन, साबुनसँगै सर्वसाधारणलाई अनावश्यक रुपमा घरबाहिर ननिस्कन, भीडभाड नगर्न, सरसफाईमा विशेष ध्यान दिन र सरकारको निर्देशन पालना गर्न सचेतना पनि दिने गरेका छन् ।

उनी राष्ट्रिय जनता पार्टी (राजपा) नेपालका सक्रिय कार्यकता समेत हुन् ।